Foto: ashyq derekkóz
Memleket basshysy Qasym-Jomart Toqaev 15 sáýirde qol qoiǵan «Qazaqstan Respýblikasynyń keibir zańnamalyq aktilerine dene shynyqtyrý jáne sport, sondai-aq artyq zańnamalyq reglamentteýdi bolǵyzbaý máseleleri boiynsha ózgerister men tolyqtyrýlar engizý týraly» Zań kúshine endi, dep habarlaidy Ult.kz.
Atalǵan zańdy Qazaqstan Respýblikasynyń Týrizm jáne sport ministrligi ázirlegen. Jańa zań sport salasyn jańǵyrtýǵa, sport saiasatynyń tiimdiligin arttyrýǵa jáne biýdjet qarajatyn ońtaily paidalanýǵa baǵyttalǵan.
Komandalyq sport túrlerindegi klýbtardy ustaýǵa arnalǵan biýdjet limitteri ailyq eseptik kórsetkishke (AEK) bailanysty bekitildi. Bul infliatsiiany eskerýge jáne qarjylandyrý kóleminiń jyl saiyn qysqarmaýyna múmkindik beredi.
Búginde basym baǵyt retinde 60-tan astam sport túri aiqyndaldy. Olardyń shamamen 30-y elimizdiń árbir óńirinde damytylady. Bul qatarǵa Olimpiada, Paralimpiada, Sýrdlimpiada, Aziia jáne Para Aziia oiyndary baǵdarlamasyna engen, sondai-aq ulttyq sport túrleri kiredi.
Sport federatsiialarynyń mártebesi naqtylandy: respýblikalyq jáne óńirlik birlestikter ulttyq akkredittelgen federatsiialar deńgeiine aýystyryldy. Akkreditatsiianyń mindetti sharty retinde – jergilikti federatsiialardyń ulttyq quramǵa músheligi bekitildi.
I toptaǵy múgedektigi bar sportshylardyń súiemeldeýshileri zańmen qorǵaldy. Olar sportshyǵa kiim aýystyrý, arbany almastyrý, meditsinalyq tekserýden ótý jáne ózge de jaǵdailarda kómek kórsetedi. Bul norma jattyǵý barysy men jarystarǵa qatysý jaǵdaiyn jaqsartýǵa baǵyttalǵan.
Sport uiymdary basshylaryn bes jyldyq merzimmen rotatsiialaý júiesi engizildi. Eger belgili bir aýdanda jalǵyz sport qurylymy bolsa, rotatsiia sol oblys sheńberindegi kórshiles aýdan nemese qala arasynda júzege asyrylady.
Atalǵan ózgerister qazirgi jaǵdaidy jan-jaqty taldaý negizinde qabyldandy. Elimizde 180-nen astam sport túri damysa da, halyqaralyq arenalarda turaqty nátije kórsetetin nebári 14 jazǵy jáne 5 qysqy olimpiadalyq sport túri bar. Qarjylyq shyǵyndardyń ósýi, nátijeniń tómendeýi jáne júieli tásildiń bolmaýy zańnamalyq reformanyń qajettiligin týǵyzdy.
Qazirgi tańda Týrizm jáne sport ministrligi zańǵa engizilgen túzetýlerdi iske asyrý jumystaryn júrgizýde.
