Ortalyq kommýnikatsiialar qyzmetinde ótken brifingide QR Bas memlekettik eńbek inspektory Tólegen Ospanqulov eńbek zańnamasyn buzýdyń resmi statistikasyn atady, dep habarlaidy QazAqparat.
«Biylǵy jyldyń 9 aiynda memlekettik eńbek inspektorlary 8 myńnan astam zańsyzdyqty anyqtady. Olardyń 30%-y eńbek qaýipsizdigi jáne eńbekti qorǵaý salasyna tiesili, Atap aitqanda, qaýipsiz eńbek jaǵdailarymen qamtamasyz etpeý (695 nemese 27%); jumyskerlerdi eńbek qaýipsizdigi boiynsha oqytý men nusqamalyqty ótkizbeý (361 nemese 14%); jeke jáne ujymdyq qorǵaý quraldarymen, arnaiy kiimmen jáne arnaiy aiaq kiimmen qamtamasyz etpeý (142 nemese 5,6%); eńbekti qorǵaý boiynsha qyzmettiń nemese jaýapty tulǵanyń bolmaýy (54 nemese 2,1%)», - dedi Bas memlekettik eńbek inspektory.
Tólegen Ospanqulovtyń málimeti boiynsha, osy zańsyzdyqtarǵa jol bergen jumys berýshilerge 2,7 myńnan astam uiǵarym berilip, 189 mln teńge somasyna 1 myńnan astam aiyppul salynǵan.
«Quqyq buzýshylyqqa kináli laýazymdy tulǵalardyń jaýapkershiligin qaraý úshin quqyq qorǵaý organdaryna 777 material jiberilip, olar boiynsha 102 qylmystyq is qozǵaldy», – dedi Tólegen Ospanqulov.
