Qazaqstanda arnaiy jumys ornyna kelip eńbektenýdi talap etpeitin salada júrgen 2,2 mln adam bar. «Eńbek resýrstaryn damytý ortalyǵy» AQ strategiia jáne jobalyq basqarý departamentiniń direktory Aleksandra Molchanovskaia osyndai málimet usyndy, dep habarlaidy QazAqparat.
«Qazaqstannyń eńbek naryǵy úshin pandemiia óte kúrdeli boldy. Biraq lokdaýn kezinde jumyssyzdyq keń aýqymda etek alǵan joq. Óitkeni merzimsiz demalysqa ketip, jumys berýshilerimen bailanysyn úzbegenderdiń sany kóp boldy. Osynyń arqasynda shekteýler alynǵan kezde jumysyna qaityp jatty. Sarapshylardyń aitýynsha, shaǵyn kásipkerlik nysandary jabylýǵa májbúr bolǵan. Biraq olar bilim salasyna kóbirek mamandanyp, sondaǵy tenderlerge qatysa bastaǵan. Áli de bolsa adamdar pandemiianyń saldaryna beiimdelý ústinde. Trendterge kelsek, kóptegen kásiporyndar jumys isteý formatyn ózgertip jatyr. Tsifrlandyrý men jumysshylaryn qaita oqytý beleń alyp tur», - dedi ol «Qazaqstannyń eńbek naryǵy: jańa jaǵdaidaǵy damý» atty tuńǵysh ulttyq baiandamanyń tanystyrylymynda.
Mamannyń aitýynsha, júzdegen, myńdaǵan adamdy jumyspe qamtyp otyrǵan iri kompaniialardyń qyzmetkerlerdi qashyqtan jumysqa jiberýi týraly naqty bir boljam aitý qiyn.
«Árkim jeke sheshim qabyldap jatyr. Resmi statistika boiynsha, qashyqtan jumyspen qamtylǵandardyń sany ázirge az ǵana. Erekshe infraqurylymdy qajet etpeitin, kompiýter men telefon arqyly isteletin jumystardyń kóbi onlain rejimge yǵysýy múmkin. Al shashtaraz siiaqty adamnyń qolymen isteletin kásipterdi onlain rejimge jiberý múmkin emes. Ekonomister men zańgerler, memlekettik basqarý salasynyń mamandary men sarapshylar qashyqtan jumysqa aýysa alady. Búginde olardyń sany – 2,2 mln adam», - deidi Aleksandra Molchanovskaia.
