1 shildedegi jaǵdai boiynsha jergilikti atqarýshy organdardyń ruqsatymen Qazaqstan aýmaǵynda 16 061 shetel azamaty eńbek etedi, dep habarlaidy "Ult aqparat" Eńbek jáne halyqty áleýmettik qorǵaý ministrligine silteme jasap.
"Shetel jumys kúshin tartýǵa ruqsattardyń arasynda mynadai sanattar bar: basshylar men olardyń orynbasarlary úshin 603 ruqsat (birinshi sanat), qurylymdyq bólimshelerdiń basshylary úshin 3 131 ruqsat (ekinshi sanat). Tartylǵan ShJK negizgi bóligi úshinshi (mamandar) jáne tórtinshi (bilikti jumysshylar) sanattarǵa jatady – tiisinshe olar 7 970 jáne 1 021 adam. Sondai-aq maýsymdyq jumystarǵa - 1 430 adam, al korporativtik aýystyrý aiasynda 1 906 adam tartyldy.
Qazirgi ýaqytta Qazaqstanda ShJK paidalanatyn 1 766 jumys berýshi bar. Olarda 397 myńnan astam Qazaqstan azamaty jumys isteidi, bul qyzmetkerlerdiń jalpy sanynyń 96%-y", - delingen habarlamada.
Eńbek migranttary keletin negizgi elder: Qytai – 3 587 adam, Túrkiia – 1 820 adam, Úndistan – 1 691 adam, Ózbekstan – 1 563 adam, Ulybritaniia – 1 123 adam.
"Ishki eńbek naryǵyn qorǵaý maqsatynda Eńbek jáne halyqty áleýmettik qorǵaý ministrligi jyl saiyn respýblikaǵa shetel mamandaryn tartýǵa kvota belgileidi jáne bóledi. Osy jylǵy qańtarda iri otandyq biznes ókilderimen kezdesý qorytyndysy boiynsha Memleket basshysynyń bergen tapsyrmasyn oryndaý úshin ministrlik shetel jumys kúshin tartýǵa arnalǵan kvotany buryn josparlanǵan 28 352 birlikten 23 560 birlikke deiin, iaǵni 4 792 adamǵa (16%) qysqartty", - deidi ministrlik ókilderi.
