Qazaqstandyq Eldos Smetov Túrkiianyń Antaliia qalasynda ótip jatqan Gran-pri týrniriniń altyn medalin ielendi, dep habarlaidy "Ult aqparat".
Qazaqstandyq sportshy 60 kg salmaqta finalda ózbekstandyq Kemran Nýrillaevpen beldesti. Rio Olimpiadasynyń kúmis júldegeri E.Smetovtiń jas qarsylasyna qaraǵanda, tájiribesi mol edi. Beldesý barysynda ońtaily ádis qoldanǵan E.Smetov vazari upaiyn alyp úlgerdi. Sodan keiin kóp uzamai taza jeńiske jetti.
Eske sala keteiik, budan buryn Eldos Smetov bastaǵan dziýdoshylardyń Gran-pri týrnirine qatysatynyn, Otgontsetseg Galbadrahtyń finalǵa joldama alyp, kúmis júldeger atanǵanyn jazǵan bolatynbyz.
Eldos Smetov – 2014 jyly Inchhonda ótken Aziia oiyndarynda 60 kelide altyn júldege ie bolǵan. 2015 jyly Astanada ótken álem chempionatynda jeńiske jetken. Rio olimpiadasynyń kúmis júldegeri.
Galbadrah Otgontsetseg Qazaqstanǵa Mońǵoliiadan kelgen. Rio olimpiadasynyń qola júldegeri. 2017 jáne 2018 jylǵy álem chempionatynda, 2018 jylǵy Aziia oiyndarynda qola alǵan.
