Keshe, 11 qazanda Qazaqstanda 1499 adamnyń analizinen koronavirýs anyqtaldy. 1435 adam Covid-ten aiyqty. Densaýlyq saqtaý ministrliginiń 11 qazan kúngi habarlamasynda solai jazylǵan.
Bir kúnde tirkelgen koronavirýs juqtyrǵandar sany jóninen Nur-Sultan qalasy alǵa shyqty. Dúisenbi kúni astanada 271 adamnan koronavirýs anyqtaldy. Almatyda 238 naýqas tirkeldi. Qaraǵandy oblysynda – 157, Pavlodar oblysynda – 155, Soltústik Qazaqstan oblysynda – 122, Aqmola oblysynda 110 adamnyń koronavirýs testi oń shyqqan.
2020 jyldyń naýryz aiynan beri 907 myń adamnyń koronavirýs testi oń shyqqan. 848 myńy jazylǵan. 11 584-i qaitys bolǵan. 10 qazanda 25 adam koronavirýstan kóz jumǵan.
Pnevmoniianyń koronavirýsqa uqsas túrin Qazaqstan biligi halyqaralyq uiymdardyń qysymynyń nátijesinde 2020 jyldyń 1 tamyzynan bastap esepke ala bastaǵan. Byltyr Qazaqstanda jazda jii kezdespeitin ókpeniń qabynýy órshigen kezde DDSU "ólim qaýpi joǵary qazaqstandyq pnevmoniia" – durys anyqtalmaǵan Covid dep málimdegen.
Sodan beri resmi málimet boiynsha, 77 myńnan astam adam koronavirýs pnevmoniiasyna shaldyqqan. 10 qazanda bul diagnoz 11 adamǵa qoiyldy. 2020 jyldyń 1 tamyzynan beri "pnevmoniia" 4925 naýqas ólimine sebepshi bolǵan. 11-i eki kún buryn kóz jumǵan.
Qazir respýblika boiynsha 53 myńǵa jýyq naýqas koronavirýstan emdelip jatyr. 9,5 myń naýqas statsionarda jatyr.
Qazir 6,9 million adam koronavirýsqa qarsy vaktsinanyń tolyq dozasyn alǵan. 900 myń adam ekinshi dozasyn kútip otyr.
Qazir Qazaqstanda 18 ben 65 jas aralyǵyndaǵy adamdarǵa reseilik "Spýtnik V" (qazir ony Qaraǵandyda óndiredi), qazaqstandyq QazVac, qytailyq Sinopharm kompaniiasynyń BAÁ-de óndirilgen Hayat-Vax pen Qytaida óndirilgen Vero Cell ekpesi, sonymen birge taǵy bir qytailyq Sinovac kompaniiasynyń CoronaVac ekpesi salynyp jatyr.
Amerikalyq Djons Hopkins ýniversitetiniń málimetinshe, álemde 238 millionnan astam adamǵa koronavirýs juqqan, 4,8 milliony qaitys bolǵan.
