Soltústik Qazaqstan oblysynda Taiynsha qalasynyń Jeleznodorojnyi shaǵyn aýdanynyń jylý infraqurylymyn jańǵyrtý jobasy aiaqtaldy. Ol 2025 jyly bastalyp, óńirdiń kommýnaldyq infraqurylymyn jańartýdyń negizgi qadamdarynyń birine ainaldy. Jumystar «Energetikalyq jáne kommýnaldyq sektorlardy jańǵyrtý» ulttyq jobasy aiasynda júzege asyryldy, dep habarlaidy jobalyq keńse.
Nátijesinde jylý trassasynyń jaǵdaiy túbegeili jaqsardy: jumys istep turǵan 2,2 shaqyrym qaita jańartyldy jáne 1,157 shaqyrym jylý jelisi salyndy. Osynyń arqasynda Jeleznodorojnyi shaǵyn aýdanynda tozý deńgeii eki eseden astamǵa tómendetildi (60%-dan 26%-ǵa deiin), bul jylýmen jabdyqtaý sapasyn arttyrdy jáne jylytý kezeńinde apat qaýpin tómendetti.
Joba qala turǵyndarynyń ómir súrý sapasyna tikelei áser etti. Endi 18 kóppáterli jáne 29 jeke turǵyn úi, 4 biýdjettik mekeme senimdi jylýmen qamtamasyz etildi. Sonymen qatar, jańartylǵan jylý trassasyna biznes nysandary (dene shynyqtyrý-saýyqtyrý kesheni men salynyp jatqan bassein) jáne birqatar jeke úiler qosylǵan.
Joba aiasynda jylýmen jabdyqtaý shemasy ońtailandyryldy: Remzavod turǵyn aimaǵynyń eskirgen qazandyǵyn paidalaný qajettiligi joiyldy. Endi jylý berý Jeleznodorojnyi shaǵyn aýdanynyń qazandyǵynan ortalyqtandyrylǵan túrde júzege asyrylady. Bul shyǵyndy qysqartyp, Jeleznodorojnyi shaǵyn aýdanyndaǵy qazandyq qyzmetkerleriniń jalaqysyn arttyrýǵa múmkindik berdi.
«Jeleznodorojnyi shaǵyn aýdanyndaǵy «TaiynshaKommýnServis» JShS jylý trassasy 1989 jyly salynǵan, uzyndyǵy 1 900 m (2 jeli), is júzinde 2 qazandyq jumys istedi. Sońǵy 10 jylda jylý trassasynyń qurylysy men jańǵyrtylýy júrgizilmegen, qys mezgilinde apatty boldyrmaý úshin JShS aǵymdaǵy jóndeý jumystaryn júrgizip, bir maýsymǵa kepildik berdi, jylý trassasyn qaita qurýǵa asa muqtaj boldy», – dedi Taiynsha aýdanynyń TKSh bóliminiń basshysy Marat Baimaǵambetov.
Investitsiianyń jalpy kólemi 745,9 mln teńgeni qurady. Negizgi qarjylandyrý Qazaqstandyq turǵyn úi kompaniiasy esebinen – 677,1 mln teńge, sondai-aq oblystyq biýdjet esebinen – 68,8 mln teńge qamtamasyz etildi.
Aita ketý kerek, júzege asyrylǵan joba EKSJ ulttyq jobasy aiasynda óńirdiń kommýnaldyq infraqurylymyn jańǵyrtý boiynsha júieli jumystyń bir bóligi. Osy baǵyttaǵy jumys 2027 jylǵa qarai TKSh salasyndaǵy jelilerdiń tozýyn kezeń-kezeńmen tómendetý jáne «qyzyl aimaqtardy» joiý maqsatynda jalǵastyrylady.
Anyqtama: «Energetikalyq jáne kommýnaldyq sektorlardy jańǵyrtý» ulttyq jobasy respýblika boiynsha 2029 jylǵa deiin iske asyrylýda jáne kommýnaldyq infraqurylymnyń tozýyn 40%-ǵa deiin tómendetýge jáne apat deńgeiin 20%-ǵa qysqartýǵa baǵyttalǵan.
