Foto: instagram.com/zholmanova.svetlana
Sot 2026 jyly 11 aqpanda burynǵy sýdia Svetlana Jolmanovany taǵy bir qylmystyq is boiynsha segiz jylǵa bas bostandyǵynan aiyrdy, dep habarlaidy sottyń baspasóz qyzmeti.
Sot Jolmanovany qylmystyq kodekstiń 190-babynyń 4-bólimi, 2) tarmaǵy boiynsha iri kólemde alaiaqtyq jasaǵany úshin kináli dep tanyp, ony segiz jylǵa bas bostandyǵynan aiyrdy.
Almaty qalasy Medeý aýdany №2 aýdandyq sotynyń 2025 jylǵy 19 maýsymdaǵy burynǵy úkimi eskerilip, sot quqyq buzýshylyqtardyń jiyntyǵy boiynsha jazalardy biriktirdi. Nátijesinde Jolmanovaǵa sońǵy merzim retinde 10 jyl bas bostandyǵynan aiyrý taǵaiyndaldy. Ol jazasyn orta qaýipsizdiktegi qylmystyq-atqarý júiesi mekemesinde óteitin bolady.
Sonymen qatar sot Jolmanovany zardap shekkenderge ótemaqy tóleý qoryna májbúrli tólem retinde 20 ailyq eseptik kórsetkish, iaǵni 73 840 teńge aýdarýǵa mindettedi.
Sot azamattyq talaptardy da qarady. Qusainova Aigúl Qairýlaevna, Amanjolova Kúlsary Tynyshjanqyzy jáne Kýsainova Tatiana Borisovnanyń talaptary qaraýsyz qaldyryldy. Rapilbekov Erjan Qamshybekulynyń talaby jartylai qanaǵattandyryldy. Svetlana Jolmanovadan 94 258 750 teńge materialdyq shyǵyn jáne 942 587 teńge memlekettik baj óndirildi. Sot 16 million teńge talap-aryzdyń qalǵan bóligin qarastyrmady.
Anetbekov Muratbai Telgozievichtiń talaby tolyq qanaǵattandyryldy. Sot Jolmanovadan 315 million teńge materialdyq shyǵyn jáne 150 myń teńge memlekettik baj óndirilsin dep sheshti. Alharov Qaiyrbek Esenbaevichtiń talaptary da tolyq kólemde qanaǵattandyryldy: 59 million teńge materialdyq shyǵyn jáne 590 myń teńge memlekettik baj memleket kirisine aýdarylady.
Eske salaiyq, 2024 jyly 9 qazan kúni eks-sýdia Svetlana Jolmanova tergeý is-qimyldaryn júrgizý úshin politsiiaǵa jetkizildi. Ol alaiaqtyq jasady dep aiyptaldy. 11 qazan kúni burynǵy sýdianyń Almatyda eki aiǵa qamaýǵa alynǵany belgili boldy. 2025 jyly 18 naýryzda Jolmanovanyń isi sotqa jiberilip, al 19 maýsymda ol 10 jylǵa bas bostandyǵynan aiyryldy.
