Foto: video skrinshot
Jýrnalist Ashat Sadyrbaidyń ústinen qylmystyq is qozǵaldy. Qylmystyq is boiynsha tergeý onyń burynǵy áieli Aiǵanym Bolatqyzynyń aryzy negizinde qozǵalǵan, dep habarlaidy Ult.kz Sn.kz -ke silteme jasap.
Ekeýiniń arasyndaǵy janjal birneshe jyldan beri jalǵasyp keledi. Jýrnalistiń ústinen qylmystyq istiń qozǵalǵanyn tergeý qyzmeti rastady. Astana qalalyq Politsiia departamentiniń Esil aýdandyq politsiia basqarmasy qylmystyq isti tergep jatyr.
Astana qalalyq PD Ashat Sadyrbaiǵa qatysty qylmystyq is qozǵalǵanyn rastady.
«Astana qalasy «Esil» aýdandyq politsiia basqarmasyna aýmaqtyq tiesiligi boiynsha 04.03.1992 jyly týǵan azamatsha Qorabaeva Aiǵanym Bolatqyzy burynǵy jubaiy — 06.06.1986 jyly týylǵan Ashat Mýratovich Sadyrbaevqa qatysty shara qoldaný týraly aryzben júgingeni anyqtaldy.
Atalǵan derek boiynsha Astana qalasy «Esil» aýdandyq politsiia basqarmasynda 09.10.2025 jyly Qazaqstan Respýblikasy Qylmystyq kodeksiniń 110-babynyń, 2-bóliginde kózdelgen qylmys belgileriniń bolýyna bailanysty №257116031000977 sotqa deiingi tergep-tekserý bastaldy», — delingen resmi jaýapta.
Aiǵanym Bolatqyzy ózin burynǵy kúieýiniń azaptap, urǵany, aiaýsyz soqqyǵa jyqqany jaily el aldynda ashyq aityp, zań organdarynan da, halyqtan da arasha surady. Alaida Ashat Sadyrbai bunyń jalǵan ekenin, jala ekenin aitqan edi. Tipten jýrnalist eks-áielin sotqa berip, jeńip te shyqqan. Biraq onyń burynǵy áieli de qarap qalǵan joq. Alǵan jaraqattaryn ashyq kórsetip, qaita aryzdanǵan.
«Qazirgi ýaqytta atalǵan is boiynsha sot-meditsinalyq saraptamalar taǵaiyndalyp, sotqa deiingi tergep-tekserý amaldary júrgizilýde», — delingen Politsiia basqarmasy bergen jaýapta.
Sonymen qatar Qazaqstan Respýblikasy Qylmystyq protsestik kodeksiniń 201-babynyń talaptaryna sáikes, tergep bekserý derekteri jariia etilmeidi.
