QR Ulttyq ekonomika ministri Áset Erǵaliev ortalyq jáne jergilikti atqarýshy organdar nazar aýdarýy tiis is-sharalardy atady, dep habarlaidy QazAqparat.
«Ortalyq jáne jergilikti atqarýshy organdarǵa mynadai sharalarǵa nazar aýdarý usynylyp otyr. Investitsiialyq jobalar pýly sheńberinde jobalardy belsendi iske asyrý kerek. «Qarapaiym zattar ekonomikasy», «Biznestiń jol kartasy – 2025» jáne Ulttyq banktiń jeńildikpen kredit berý baǵdarlamasy sheńberinde kásipkerlerdi qoldaý quraldarynyń tiimdi iske asyrylýyn qamtamasyz etý qajet», - dedi Ulttyq ekonomika ministri búgingi Úkimet otyrysynda.
Sonymen birge, ministr memlekettik uiymdardyń, ulttyq kompaniialardyń jáne jer qoinaýyn paidalanýshylardyń taýarlar men kórsetiletin qyzmetterdi satyp alýda qazaqstandyq qamtý úlesin ulǵaitý sharalaryn kúsheitýdi atap ótti.
«Eńbek naryǵyndaǵy turaqtylyqty qamtamasyz etý úshin «Eńbek» jáne «Jumyspen qamtý jol kartasy» baǵdarlamalary sheńberinde jobalardy iske asyrý kerek. Tutyný taýarlary baǵalarynyń serpindi monitoringin jáne tiisti turaqtandyrý sharalaryn qabyldaý kerek. Joǵaryda kórsetilgen sharalardy iske asyrý makroekonomikalyq turaqtylyqty saqtaýǵa oń yqpal etedi», - deidi Áset Erǵaliev.
