QR Aqparat jáne qoǵamdyq damý ministrligi «Ekologiialyq bilim: qazaqstandyq qoǵamda ekologiialyq bilim berý, ekologiialyq mádenietke tárbieleý jáne qalyptastyrý» taqyrybynda dóńgelek ústel ótkizdi, dep habarlaidy QazAqparat tilshisi.
«...Adam aýrýlarynyń kóptegen túrleri qorshaǵan ortadaǵy keleńsiz ózgeristermen tikelei nemese janama túrde bailanysty ekeni anyqtalǵan. Biraq halyqtyń naýqastanýynyń ekologiialyq faktorlary men sebep-saldaryna ázirge elimizde jetkilikti deńgeide nazar aýdarylmai otyr. Ekologiialyq saýatsyzdyqty joiý - halyq arasynda júrgiziletin mańyzdy máselege ainalýy tiis. Tabiǵat pen qorshaǵan ortany qorǵaýdyń joldaryn uǵyndyrý, jalpyhalyqtyq ekologiialyq saýatty ashý, jastarǵa úzdiksiz bilim berý nátijesinde ǵana sheshiledi, - dedi QR Aqparat jáne qoǵamdyq damý ministri Aida Balaeva dóńgelek ústeldiń ashylýynda.
Ministr sońǵy ýaqytta adamnyń tabiǵatqa qatysty jabaiy áreketi kóptep baiqalǵanyn, onyń sońy apatqa ákep soǵatynyn atap ótti.
«Býrabaidaǵy taý bolyp úiilgen qoqys, qyzǵylt kóldiń balshyǵy men tuzyn qazyp áketý, Almatydaǵy sirek kezdesetin lotos gúlderin julý – qazaqstandyqtardyń narazylyǵyn týdyrǵan qylyqtardyń bir parasy ǵana. Sondyqtan, búgin ózekti máselelerdi talqylap qana qoimai, ekologiialyq aǵartý, jańa býyndy, jaýapty adamdardy tárbieleý boiynsha egjei-tegjeili usynymdardy da tyńdaǵymyz keledi. Qazaqstannyń biregei tabiǵi bailyǵy jyl saiyn adamdardyń yqpalymen azaiyp keledi. Olardyń kópshiligin qalpyna keltirý men qaitarý múmkin emes. Sondyqtan memleket urpaqtar úshin tabiǵi bailyqty saqtaýǵa qajetti barlyq sharalardy qabyldaýǵa mindetti. Biraq bolashaq urpaqty da qorshaǵan ortaǵa uqyppen qaraý dástúri úzilmeitindei jáne urpaqtan-urpaqqa beriletindei etip tárbieleý qajet», - dedi Aida Balaeva.
