Ekologiia, geologiia jáne tabiǵi resýrstar ministrligi Jaiyq ózeni taiazdyǵy jáne Atyraý mańynda araldar paida bolýynyń negizgi sebepterin atady, - dep habarlaidy Tengrinews.kz.
Ekologiia ministrligi buǵan deiin buqaralyq aqparat quraldarynda jariialanǵan Atyraýdan 25 shaqyrym jerde ornalasqan ózen taiazdyǵy týraly aqparatty tekserip, nátijelerin habarlady.
Tekserýdi Sý resýrstary komitetiniń Jaiyq-Kaspii basseindik inspektsiiasy ókilderi Atyraý oblysy ákimdigimen birlesip júrgizdi. Bul jer jeldi jáne jelden paida bolatyn sý tolqyny aimaǵynda ornalasqandyǵy anyqtaldy. 19 jáne 20 qyrkúiekte soltústik-batystan soqqan jel Kaspii teńizi deńgeiine áser etti, sondyqtan Jaiyq taiazdanyp, araldar paida boldy. Qazir bul aimaqta ońtústik-batystan jel soǵady, sondyqtan sýdyń keri tolqyny bolyp, araldar sýǵa tolady.
Mamandar sońǵy jyldary ózen basseininde sý azaiǵanyn atap ótti. "Ianvartsevo" ólsheý stantsiiasy shekaralyq ýchaskesinde baiqalǵan aǵyn 3,5 - 5,5 tekshe shaqyrymdy qurady, ortasha jyldyq aǵys 8,14 tekshe shaqyrymǵa jetken. Jaiyq ózeni aǵynynyń 80 paiyzǵa jýyǵy Resei Federatsiiasy aýmaǵyna tiesili.
Reseidegi Iriklinskoe sý qoimasy kólemi de 2020 jyl osy ýaqyttaǵy 2808 million tekshe kilometrden biyl 2681 million tekshe kilometrge deiin tómendedi.
