Foto: DSM
Qazaqstan Respýblikasy Densaýlyq saqtaý ministrligi elde sirek kezdesetin jaǵdai tirkelip, bir ýaqytta eki mýltiaǵzalyq donorlyq protsess júzege asyrylǵanyn málimdedi, dep habarlaidy Ult.kz.
Ministrlik dereginshe, mundai operatsiialar transplantologiia júiesiniń joǵary deńgeide úilesimdi jumysyn talap etedi. Donorlardyń biri – Astanada 1981 jyly týǵan áiel. Mi ólimi tirkelgennen keiin onyń týystary qaitys bolǵannan keiingi donorlyqqa kelisim bergen.
Osy sheshimniń arqasynda uzaq ýaqyt boiy kezekte turǵan birneshe naýqasqa birden kómek kórsetildi. Donordan alynǵan júrek, ókpe, baýyr jáne búirek syndy aǵzalar elimizdiń túrli óńirlerindegi, sonyń ishinde Astana, Jetisý, Soltústik Qazaqstan jáne ońtústik aimaqtardaǵy patsientterge transplantatsiialandy.
Bir mezgilde eki donorlyq protsesti júzege asyrý birneshe meditsinalyq toptyń jedel ári úilesimdi áreketin talap etken. Operatsiialarǵa Almatydan Syzǵanov atyndaǵy Ulttyq ǵylymi hirýrgiia ortalyǵy, Astanadan UMC kardiohirýrgiialyq ortalyǵy mamandary, sondai-aq sanitariialyq aviatsiia borttary men jergilikti qyzmetter jumyldyrylǵan.
Barlyq jumystardy Transplantattaý men joǵary tehnologiialyq meditsinalyq qyzmetterdi úilestirý jónindegi respýblikalyq ortalyq úilestirgen.
Vedomstvonyń málimetinshe, bul jaǵdai transplantattaý júiesiniń joǵary júktemege daiyn ekenin jáne kúsheitilgen rejimde tiimdi áreket ete alatynyn kórsetti.
Sońǵy eki jylda salada oń dinamika baiqalady. Áleýetti donorlardy anyqtaý kórsetkishi 2023 jylǵy 49 jaǵdaidan 2025 jyly 186-ǵa deiin artqan. Al qaitys bolǵannan keiingi donorlyq protsester sany 2023 jylǵy 7 jaǵdaidan 2025 jyly 19-ǵa jetken. Bul júzdegen patsienttiń ómirin saqtap qalýǵa múmkindik bergen.
Densaýlyq saqtaý ministrligi donorlardyń týystaryna alǵys bildirip, mundai sheshimder birneshe adamnyń ómirin qutqarýǵa múmkindik beretinin atap ótti. Sonymen qatar, elde donorlyq mádenietti damytý jáne sanaly tańdaý jasaý mańyzdylyǵy erekshe ekeni aityldy.
