Almatyda bótelkelesterin óltirgen er adam 17 jylǵa bas bostandyǵynan aiyryldy, dep habarlaidy QazAqparat.
Almaty qalalyq PD tergeý basqarmasynyń málimetinshe, osy jyldyń jazynda asa aýyr qylmys tirkeldi.
Ishimdik ishý kezinde er adamdardyń arasynda janjal týyndap, 43 jastaǵy E. esimdi azamat K. jáne B. esimdi bótelkelesterin pyshaqtap tastaǵan.
«Ókinishke qarai, jaralanǵandardyń ekeýi de esin jimastan aýrýhanada kóz jumdy. Kúdikti birden ustalyp, qamaýǵa alyndy. Tergeý onyń áreketin QR QK 99-baby 2-bóligimen saralady. E. esimdi azamat sol kúni-aq ýaqytsha ustaý izoliatoryna qamaldy. Qylmystyq is materialdarynan belgili bolǵandai, otyrys jeke úidiń aýlasynda bolǵan. Bir kezde ekeýi daýlasa bastaidy. E. aldymen K. esimdi azamatqa, sosyn olardy ajyratpaq bolǵan B-ǵa pyshaq suǵady», – deidi Almaty qalalyq politsiia departamenti bastyǵynyń orynbasary Rústem Ábdirahmanov.
Politsiia ókiliniń aitýynsha, onyń qylmysy dáleldenip, 17 jylǵa sottaldy.
«Almaty qalasynyń qylmystyq ister jónindegi mamandandyrylǵan aýdanaralyq sotynyń úkimimen 43 jastaǵy E. qylmys jasaǵany úshin kináli dep tanylyp, 17 jylǵa bas bostandyǵynan aiyryldy», - deidi ol.
