Shyǵys Qazaqstan turǵyndary densaýlyǵyna kóńil bólip, ýaqyt únemdep, tamaq daiyndaýdy kásibi mamandarǵa senip tapsyrmaq bolǵan. Olar jeke kásipkermen durys tamaqtaný ratsionyn jetkizý týraly kelisimsharttar jasap, adal klientter retinde qyzmet aqysyn tolyqtai aldyn ala tólegen. Alaida kásipker tamaqty jetkizýdi sebepsiz toqtatqan, dep habarlaidy ult.kz.
Ýáde etilgen ratsiondar jetkizilmese de, tutynýshylardyń tólep qoiǵan aqshasyn kásipker qaitarýǵa asyqpaǵan. Bireýge bul soma asa úlken bolyp kórinbeýi múmkin. Biraq japa shekken adamdardyń sany kóbeigende, másele jekelegen turmystyq daý emes, tutynýshylardyń quqyqtaryn jappai buzýǵa faktisine ulasady.
Óńir turǵyndary kómek surap, jappai ShQO boiynsha Saýda jáne tutynýshylardyń quqyqtaryn qorǵaý departamentine júgindi. Nátijesinde bul oqiǵaǵa bir ǵana narazy klient emes, dál osyndai jaǵdaiǵa tap bolǵan birden 21 tutynýshy qatysty.
Departament tutynýshylardyń múddesin qorǵaýǵa kiristi. Aldymen máseleni sotqa jetkizbei sheshýge áreket jasalǵan. Tutynýshylar kásipkerdiń ózine tikelei júginip, Departament kásipkerlik sýbektisine sotqa deiingi talap ta joldady. Alaida bul ótinishter de, aqshany qaitarý týraly talaptar da nátije bermedi. Osydan keiin is sotqa jetti.
Qazaqstan Respýblikasynyń «Tutynýshylardyń quqyqtaryn qorǵaý týraly» zańy azamattardyń qyzmetterdiń tiisti sapasyn talap etýge quqyly ekenin tikelei qarastyrady. Al qyzmet tiisti deńgeide kórsetilmegen nemese oryndaýshy óz mindettemelerin oryndamaǵan jaǵdaida, tutynýshy shartty buzyp, tólegen aqshasyn qaitarýdy talap ete alady. Sonymen qatar zańnama ýákiletti organǵa birdei quqyq buzýshylyq onnan astam adamnyń quqyqtaryna qatysty bolǵan jaǵdaida, tutynýshylardyń belgisiz tobynyń quqyqtaryn qorǵaý úshin sotqa júginýge múmkindik beredi. Bul jaǵdaida olardyń sany 21 adam boldy.
Departament zardap shekken klientterdiń quqyqtaryn qorǵaýdy jáne kórsetilmegen qyzmetter úshin aqshalaryn qaitarýdy talap etip, Óskemen qalasynyń azamattyq ister jónindegi aýdanaralyq sotyna ujymdyq talap-aryz berdi. 2026 jyldyń 16 shildesinde sot Departamenttiń talap-aryzyn qanaǵattandyryp, bul iske núkte qoidy.
Endi kásipker 21 tutynýshyǵa kórsetilmegen qyzmetterdiń aqshasyn ǵana emes, talaptardy oryndaý merzimin buzǵany úshin turaqsyzdyq aiybyn da tóleýge mindetti.
Negizgi materialdyq zalal 3 055 138 teńgeni qurady, taǵy 611 028 teńge turaqsyzdyq aiyby retinde óndirildi.
