Atyraý oblysynda 385 sýbekt «Ashyq» qosymshasymen jumys istep jatyr. Bul týraly Ortalyq kommýnikatsiialar qyzmetindegi brifing barysynda Atyraý oblysynyń ákimi Mahambet Dosmuhambetov aitty, dep habarlaidy QazAqparat.
«Tutastai alǵanda jaǵdai turaqty. 26 mamyrdan bastap oblysymyz «sary» aimaqta. Infektsiialyq tósekterdiń júktemesi 16 paiyzdy quraidy. Em alyp jatqan naýqastardyń sany – 337. Oblys boiynsha 12 statsionarda 2 098 naýqasqa infektsiialyq tósek-oryn jasaqtalǵan. Onyń 81-i reanimatsiialyq oryn. Qosymsha 750 rezervtik tósek daiyndaldy», - dedi oblys ákimi.
Onyń dereginshe, aqpannan beri óńirge 111 200 doza vaktsina jetkizildi. Oblys boiynsha barlyq talaptarǵa sai keletin vaktsinatsiia salatyn 41 ekpe pýnkti ashyldy.
«Búginde 69 304 adam vaktsinanyń I komponentin, 27 569 adam II komponentin aldy. Óńirimizde qazirgi kezde 385 sýbekt «Ashyq» qosymshasyn engizip, QR-kodpen jumys isteýde», - dedi Mahambet Dosmuhambetov.
