Foto: Instagram/janibek_alimkhanuly
International Boxing Federation (IBF) qazaqstandyq boksshy Jánibek Álimhanulyn orta salmaqtaǵy álem chempiony ataǵynan aiyrdy. Bul týraly 10 naýryz keshinde Qazaqstannyń kásibi boks federatsiiasynyń prezidenti Rahymjan Erdenbekov málimdedi, dep habarlaidy Ult.kz.
Onyń aitýynsha, IBF direktorlar keńesi chempiondyq belbeýdi bos dep jariialaý týraly sheshim qabyldaǵan. Federatsiia erejesine sáikes, kez kelgen chempion óz titýlyn toǵyz ai ishinde qorǵaýy tiis. Alaida qazirgi jaǵdaiǵa bailanysty bul talap oryndalmaǵan.
IBF joldaǵan hatta Jánibek Álimhanulynyń 2026 jyldyń 2 jeltoqsanyna deiin shettetilgeni kórsetilgen. Osyǵan bailanysty uiym 2026 jylǵy 5 naýryzda titýldy dereý bos dep jariialaý týraly sheshim qabyldaǵan.
Rahymjan Erdenbekovtiń aitýynsha, bul jaǵdai boksshy komandasy úshin úlken sabaq bolǵan.
“Jánibek biyl úlken ringke burynǵydan da myqty bolyp oralady dep senemiz. Ol aldaǵy ýaqytta tórt birdei álem titýlyn jeńip alýǵa qaýqarly”, – dedi federatsiia basshysy.
Sonymen qatar, Álimhanulynyń komandasy bul sheshimge qatysty apelliatsiialyq shaǵym túsirmek.
Aita keteiik, 2025 jyldyń jeltoqsanynda Jánibek Álimhanuly doping-testten óte almai qalǵan. Osydan keiin Qazaqstannyń kásibi boks federatsiiasy ony alty aiǵa jekpe-jekterden shettetken.
Sońǵy diskvalifikatsiiaǵa qaramastan, boksshy áli de World Boxing Organization (WBO) nusqasy boiynsha orta salmaqtaǵy álem chempiony bolyp sanalady. Aqpan aiynda uiym oń doping-testine bailanysty ony 2026 jyldyń 2 jeltoqsanyna deiin bir jylǵa shettetken.
