QR Bilim jáne ǵylym ministrligi Joǵary jáne joǵary oqý ornynan keiingi bilim departamentiniń direktory Ádilet Toibaev doktorantýraǵa túsý emtihany qalai júrgiziletinin túsindirdi, dep habarlaidy QazAqparat.
«Osy jyly doktorantýrada úlken ózgerister boldy. Doktorantýraǵa túsý erejesine ózgerister engizildi. Onyń ishinde túsý emtihany jańa formatta ótedi. Doktorantýraǵa qujattar joǵary oqý oryndarynyń qabyldaý komissiialary arqyly Ulttyq testileý ortalyǵynyń saitynda qabyldanady. Endi túsýshiler túsý emtihandaryn óńirlik testileý ortalyqtarynda kompiýterlik formatta tapsyrady. Kelesi kúni emtihannyń qorytyndysy shyqqannan keiin nátijesimen kelispegen jaǵdaida túsýshi appeliatsiiaǵa ótinish bere alady», - dedi ol ministrliktiń apparat jinalysynda.
Departament basshysynyń atýynsha, doktorantýraǵa túsken bilim berý grantynyń iegerleriniń tizimi joǵary oqý oryndarynyń saittarynda jariia etiledi.
«Doktorantýraǵa túsýshi tirkelý barysynda jeke málimetterin toltyryp, túsý josparlanǵan bir bilim berý baǵdarlamasyn jáne 1 joǵary oqý ornyn tańdaidy. Emtihandy ótkizý ýaqyty men orny túsý emtihany bastalǵanǵa deiin Ulttyq testileý ortalyǵynyń saitynda jariialanady. Doktorantýraǵa túsý emtihany esse jazýdan - 20 ball, oqýǵa daiyndyǵyn anyqtaýǵa arnalǵan testten – 30 ball jáne beiindi bilim berý baǵdarlamasy boiynsha suraqtarǵa jaýap berý 50 balldan turady. Qorytyndy baǵa atalǵan bólimder ballynyń qorytyndysymen baǵalandy», - dedi Ádilet Toibaev.
