Úndistannyń Dári-dármekter jónindegi (DCGI) Bas baqylaýshysy juma kúni koronavirýsqa qarsy ZyCoV-D Zydus Cadila vaktsinasyn shuǵyl qoldanýǵa ruqsatyn berdi. Úndistannyń Ǵylym jáne tehnologiialar ministrliginiń málimdeýinshe, DNQ negizinde jasalǵan álemdegi alǵashqy koronavirýs vaktsinasyn eresekterge jáne 12 jastan asqan balalarǵa salýǵa bolady, dep habarlaidy QazAqparat India TV News Desk-qa silteme jasap.
28 myń erikti qatysqan III klinikalyq synaqtyń aralyq qorytyndysy PTR-dyń oń nátijesi bar jaǵdaida bastapqy tiimdiligi 66,6%-ǵa jetkenin kórsetti. Qazirgi kezde bul Úndistanda COVID-19 virýsyna qarsy vaktsinanyń eń úlken synaǵy. Bul vaktsina buryn ótkizilgen I/II synaq kezinde óziniń immýnogendigin, tózimdiligi jáne qaýipsizdigi turaqty ekenin kórsetti. I/II jáne III klinikalyq synaqty Málimetter qaýipsizdigine monitoring jasaý táýelsiz keńesi (DSMB) qadaǵalaǵan.
1 shildede shtab páteri Ahmedabadta ornalasqan iri DCGI farmatsevtika kompaniiasy vaktsinany shuǵyl paidalanýǵa ruqsat alý úshin ótinim jibergen. Kompaniia vaktsinany qazirgi kezde Úndistannyń 50-den astam ortalyǵynda iri klinikalyq synaqtan ótkizgenin málimdedi.
Endi ZyCoV-D – elde qoldanýǵa ruqsat etilgen altynshy vaktsina. Úndistanda Serum Institute-tiń Covishield, Bharat Biotech-tiń Covaxin, reseilik Sputnik V, amerikandyq Moderna jáne Johnson and Johnson vaktsinalary qoldanylyp keledi.
Plazmida DNQ negizinde ázirlengen ZyCoV-D vaktsinasyn teri astyna inesiz inektordyń kómegimen salǵan jón.
Zydus Group tóraǵasy Pankadj R. Patel (Pankaj R Patel) olardyń «qaýipsiz, tózimdiligi jaqsy ári tiimdi vaktsinany» shyǵara alǵanyna dán rizashylyǵyn bildirdi.
«Osyndai sheshýshi kezeńde jáne barlyq problemaǵa qaramastan álemde koronavirýsqa qarsy alǵashqy DNK-vaktsinasyn shyǵarý – úndistan zertteýshi ǵalymdarynń eńbegi jáne olardyń jańashyldyq rýhy», - dedi ol.
