«Diplommen aýylǵa» baǵdarlamasynyń igiligin aýdandyq qalaǵa baratyn jastar kóre me? Senatorlardyń osy suraǵyna Úkimet resmi túrde jaýap berdi, dep habarlaidy "Ult aqparat".
Aita ketsek, buǵan deiin senatorlar «Diplommen aýylǵa» baǵdarlamasynyń kemshin tustaryn alǵa tartyp, Premer-ministrdiń atyna depýtattyq saýal joldaǵan bolatyn. Olardyń aitýynsha, jastardyń keibiri aýdan ortalyqtaryna barǵanymen, ol eldimekender «qala» mártebesine ie bolǵandyqtan, osy baǵdarlamanyń igiligin kóre almai jatady. Sol sebepti depýtattar Úkimetten monoqalalar men shaǵyn qalalarǵa baratyn jastardy qoldaýdy suraǵan edi.
Bul suraqqa jaýap bergen Úkimet basshysy aýdandyq mańyzy bar qalalarǵa keletin mamandarǵa «Diplommen aýylǵa» baǵdarlamasynyń áleýmettik qoldaý sharalaryn usynýdyń da kemshiligi baryn aitady. Máselen, munyń saldary aýyldy jerden mamandardyń ketýine, kadrlar tapshylyǵynyń odan ári ulǵaiýyna, sondai-aq biýdjet shyǵyndarynyń aitarlyqtai ósýine ákelýi yqtimal.
Asqar Mamin sondai-aq biyldan bastap jobaǵa aýyldyq (kenttik) okrýg ákimdikteriniń apparattarynda jumys isteitin memlekettik qyzmetshiler engizilgenin, bul tiisinshe memlekettik biýdjettiń shyǵys bóligin ulǵaitqanyn jetkizdi.
«Bul rette qoldanystaǵy zańnamaǵa sáikes, jergilikti atqarýshy organdar qalalarda jumys isteitin keibir mamandarǵa jergilikti biýdjet qarajaty esebinen áleýmettik qoldaý sharalaryn kórsete alady. Mysaly, «Halyq densaýlyǵy jáne densaýlyq saqtaý júiesi týraly» kodeksine sáikes oblystardyń, respýblikalyq mańyzy bar qalalardyń jáne astananyń jergilikti ókildi organdary aýyldy jáne qalalyq eldimekenderge jumys isteý úshin jiberilgen meditsina jáne farmatsevtika qyzmetkerlerin áleýmettik qoldaý sharalarynyń júiesin aiqyndaidy. Sondai-aq áleýmettik qoldaý sharalaryn usyný, osy saladaǵy jas mamandardy ustap qalý jáne jumyspen óteý monitoringin júzege asyrady. Kodekstiń 272-babynyń 1-tarmaǵyna sáikes, áleýmettik qoldaý sharalaryna turǵyn úi berý, járdemaqy tóleý, kommýnaldyq shyǵystardy óteý jáne ózge de sharalar jatady», - deidi Asqar Mamin.
Úkimet basshysy sondai-aq Prezidenttiń tapsyrmasyna sáikes, Úkimet aýyldy aýmaqtar men shaǵyn qalalar boiynsha ulttyq jobany pysyqtap jatqanyn aityp ótti.
«Ulttyq jobada áleýmettik jáne injenerlik infraqurylymdy keshendi jańǵyrtý, shaǵyn nesie berýdi qosa alǵanda, kásipkerlikti memlekettik qoldaý, qala quraýshy kásiporyndardy qoldaý, shaǵyn qalalardaǵy turǵyn úi qurylysy, nátijeli jumyspen qamtýdy qoldaý jáne shaǵyn qalalarǵa qonys aýdarýǵa járdemdesý jáne basqa da is-sharalar kózdeledi. Kórsetilgen sharalar ekonomikanyń jańa sektorlaryn damytýǵa, shaǵyn qalalardan halyqtyń kóshi-qon aǵynyn azaitýǵa, shaǵyn qalalar halqynyń ómir súrý sapasy men ál-aýqaty deńgeiiniń ósýine yqpal etedi. Sondai-aq atalǵan keshendi sharalar osy eldimekenderdiń kadrlyq áleýetin kúsheitýge de múmkindik beredi. Osynyń negizinde aýdandyq mańyzy bar qalalarǵa jumys isteý jáne turý úshin keletin mamandar úshin áleýmettik qoldaý sharalaryn usyný máselesi ulttyq jobany pysyqtaý barysynda qaralady», - dedi ol.
