Ishki ister ministrligi qazaqstandyqtardy dipfeik tehnologiialary men jalǵan brokerlerdi paidalanatyn internet-alaiaqtardan saq bolýǵa shaqyrdy, dep habarlaidy ult.kz.
Vedomstvonyń málimetinshe, sońǵy ýaqytta alaiaqtar messendjerler men áleýmettik jelilerde jasandy intellekt kómegimen tanymal tulǵalardyń beinesin qoldana otyryp, azamattardy jalǵan investitsiialyq jobalarǵa aqsha salýǵa úgitteýde. Olar jyldam ári kepildendirilgen tabys ýáde etedi.
Qaskóiler jábirlenýshilerge mobildi qosymshalar ornatýdy, kúmándi siltemelerge ótýdi nemese «investitsiia», «tirkeý» jáne «tabysty arttyrý» degen jeleýmen aqsha aýdarýdy usynady. Aqsha jiberilgennen keiin bailanys úzilip, ýáde etilgen paida tólenbeidi. Kei jaǵdaida alaiaqtar «salyq» nemese «saqtandyrý jarnasyn» tóleýdi talap etip, qaita-qaita aqsha suraidy.
IIM mundai derekter boiynsha sotqa deiingi tergep-tekserý júrgizilip jatqanyn habarlady. Sonymen qatar qylmysqa qatysy bar adamdardy anyqtaý, alaiaqtyq saittardy jáne zańsyz aqsha aýdarý arnalarynyń jumysyn toqtatý sharalary qabyldanýda.
Ministrlik azamattarǵa kúmándi investitsiialyq usynystarǵa senbeýge, beitanys adamdarǵa aqsha aýdarmaýǵa, tek resmi aqparat kózderine súienýge keńes berdi. Internet-alaiaqtyqqa tap bolǵan jaǵdaida birden politsiiaǵa nemese 102 arnasyna habarlasý qajet.
