Qazaqstan Musylmandary dini basqarmasynyń tóraǵasy, Bas múfti Naýryzbai qajy Taǵanuly koronavirýs pandemiiasy kezinde halyqqa qandai kómek kórsetilgenin baiandady, dep habarlaidy QazAqparat.
«Biz el basyna kún týǵanda asarlatyp, jylý jinap, qaiyrymydylyqtan shet qalmaǵan halyqpyz. Qazaqstan Musylmandary dini basqarmasyna qarasty «Zeket» qory «Ómirge úmit syila» aktsiiasyn uiymdastyryp, jamaǵat pen demeýshiler kómegimen 255 dana ottegi jeldetkishin el aýrýhanalaryna jetkizip berdi. Oǵan qosa, Dini basqarmanyń muryndyq bolýymen 200 myńnan astam otbasyǵa azyq-túlik, 42 myńnan astam meditsinalyq maskalar taratyldy. Osy isti júzege asyrǵan dini qyzmetkerlerge jáne olarǵa qoldaý kórsetken kásipker azamattarǵa Alla razy bolsyn, amaldary saýapty bolsyn degim keledi», - dedi Bas múfti Ortalyq kommýnikatsiialar qyzmetinde.
Sonymen birge, elimizde TJ jariialanǵan sátten bastap, imamdar men dini ǵalymdar áleýmettik jelilerde kúnine úsh ret ýaǵyz aityp, halyq suraqtaryna jaýap berip, túsindirý jumystaryn júrgizip keledi.
