Dimash Qudaibergenniń Máskeýdegi Kreml sahnasynda ótken alǵashqy jeke kontsertine 56 elden fanattar keldi, dep jazady Sputnik agenttigi.
Ánshiniń Resei tórindegi alǵashqy kontsertine fanattary úsh saǵat buryn jinala bastady. Olar qoldaryna "Dimash" dep jazylǵan plakattaryn, qushaq-qushaq gúlderin ustap kelgen. Kóńil-kúi kóterińki, kórermender kontserttiń joǵary deńgeide ótetinine senimdi.
"Ótken jyly jeltoqsanda Máskeýde Dimashtyń kontserti ótetinin estigen ýaqyttan bastap daiyndala bastadyq. Bul - biz úshin óte erekshe oqiǵa. 17 jeltoqsanda biletter satylymǵa shyqqan kezde 20 minýttyń ishinde fanattar zaldyń ortasyndaǵy jaqsy oryndardy alyp qoidy. Keiin Dimashtyń ekinshi kontserti ótetini belgili boldy.
Biz Dimashqa qoldaý kórsetý úshin eki kontsertine de baramyz. Únemi janynda bolýǵa tyrysamyz, áýejaidan ózin de, otbasyn da qarsy alyp, qanshalyqty jaqsy kóretinimizdi kórsetýge tyrystyq", - dedi Nora esimdi Eýraziia fan-klýbynyń Máskeýdegi bólimshesiniń múshesi.
Máskeýlik Antonina Smirnova da Eýraziia fan-klýbynyń múshesi. Aitýynsha, Dimashtan asyp túsetin ánshi qazir álemde joq.
"Áýeli stýdent qyzym Dimashtyń ónerine tánti bolyp, keiin maǵan internetten kórsetti. Ol Máskeýdegi fan-klýbty taýyp alyp, ekeýmiz bir jyldan beri múshemiz. Dimash ándi keremet aitady, mundai daýysty buryn-sońdy estigen emespin. Ol án shyrqaǵan kezde denemiz túrshigip, kózimizge jas úiiriledi", - deidi ol.
Al Olga Terekof jubaiymen Germaniianyń Fýlda qalasynan arnaiy Dimashtyń kontsertine kelgen. Buǵan deiin Londondaǵy kontsertinde bolyp, umytylmas áser alǵan eken.
"Keshe álemniń túkpir-túkpirinen kontsertke kelgen fanattarmen kezdestik. Alty saǵatqa sozylǵan keshke ata-ájesi, anasy, dostary keldi. Birge án shyrqap, baiqaýlar ótkizip, tamasha kezdesý ótkizdik. Dimashtyń shyǵarmashylyǵymen bir jyl buryn tanystym. Sodan beri úzbei baqylap kelemin. Qazaqstanda áli bolǵan joqpyn, biyl Astanada ótetin kontsertine baryp qalýym múmkin", - dedi Dimashtyń tyńdarmany.
Máskeýlik Svetlana Gýrskaia Dimash Qudaibergenniń Kremldegi kontsertinen keremet áser alatynyna senimdi. Aitýynsha, jas ánshiniń eshkimge uqsamaityn qaitalanbas daýysy kez kelgen adamdy tebirentpei qoimaidy.
"Men Dimashty tyńdaǵan saiyn mádeni "shok" alamyn, orasan keń daýyspen aita otyryp, osynsha emotsiia kórsetetini tańǵaldyrmai qoimaidy. Vokaldyq múmkindigi zor, biraq másele tek onyń teńdessiz daýysy men ándi sheber oryndaýynda ǵana emes, ol shynaiy. Mýzykadaǵy emotsiiany ózi arqyly ótkizip, ándi búkil jan-dúniesimen, júregimen oryndaidy. Keremet! Keibir ánshiler sekildi sahnaǵa shyǵyp, áiteýir birdeme aityp, aqshasyn alýdy oilamaidy. Osy qasieti úshin jaqsy kóremiz", - deidi ol.
Al Máskeý turǵyny Marýsia Svetlova Dimashtyń siqyrly daýysyn alǵash ret estigende qandai sezimde bolǵanyn aityp berdi.
"Dimashty alǵash ret YouTube-taǵy rolikten kórip, aýzym ashylyp qaldy. Jap-jas jigittiń osynsha oktavada án aitýy múmkin emestei kórindi. Odan keiin internettegi barlyq kontsertterdi, baiqaýlardy kórip shyqtym. Al birneshe aidan keiin ápkem Máskeýde Dimashtyń jeke kontserti ótetinin aitqan kezde qýanyshymda shek bolmady. Daryndy, tanymal, máskeýlik juldyzdy elitadan emes, ol juldyzdardyń bárin kóleńkesinde qaldyrdy", - dedi ol.
Qytaidan Dimashtyń 300-den astam fanaty Máskeýge at terletip kelipti.
"Dimash qai elde óner kórsetpesin, biz ylǵi qoldaý kórsetýge daiynbyz. Biz ony I am singer jobasyndaǵy alǵashqy áninen beri jaqsy kóremiz, milliondaǵan "dears" onyń ónerine tánti. Biz úshin onyń mýzykasy, onyń ánderi óte mańyzdy. Dimashtyń Máskeýdegi eki kontserti de keremet ótetinin bilemiz", - dedi qytailyq fanattar.
Dimashqa qoldaý kórsetýge ánshi, kompozitor Ulyqpan Joldasov otbasymen arnaiy kelgen.
"Buryn tek Qytaida kontsert beredi dep bári aitýshy edi. Qudaiǵa shúkir, Eýropany sharlady. Amerikaǵa baryp shýlatyp qaitty. Ol jaqta da kontserti bolady dep kútilýde. Máskeýdegi kontserti qutty bolsyn deimiz. Budan keiin Astanadaǵy "Arnaý" kontsertin kútemiz. Búgingi keshi jaqsy ótetinine júz paiyz senimdimin", - dedi ánshi.
Aita ketsek, 19 naýryzda Dimash Qudaibergenniń túrli elden kelgen fanattary ánshini Máskeý áýejaiynan zor qoshemetpen qarsy aldy. Reseilikter orys halqynyń dástúrimen qadirli qonaǵyna nan men tuzdan aýyz tigizdi. Dimashtyń ónerine tánti jurt qoltańbasyn alyp, sýretke túsip, syilyqtaryn tartý etip, máre-sáre bolǵan edi. Kelesi kúni ánshiniń tyńdarmandary onyń otbasyn da áýejaidan qushaq jaia qarsy aldy.
Dimash Qudaibergenniń Máskeýdegi D-Dynasty kontserti Igor Krýtoidyń prodiýserlik ortalyǵynyń qoldaýymen ótti. Buǵan deiin kontserttiń úzilissiz úsh saǵat bolatyny aitylǵan edi.
Ótken jyldyń jeltoqsan aiynda ánshi Kreml saraiynyń sahnasynda óner kórsetetinin habarlaǵan edi. Áýeli Dimash bir kontsert berýi tiis edi, biraq biletter jyldam satylyp ketip, reseilik taraptyń ótinishimen qazaqstandyq ánshi kelesi kúni de sahnaǵa shyǵýǵa kelisim beredi.
Elimizdiń jas ánshisi Dimash Qudaibergen az ýaqyttyń ishinde búkil álemge tanyldy desek artyq aitpaspyz. Ánshiniń juldyzdy joly "Slavian bazary" festivalinde bastalyp, Qytaidaǵy halyqaralyq "I am singer" baiqaýynan keiin asqaqtai tústi. Aziiadaǵy marapattardyń kópshiligin jeńip alǵan Dimashtyń álem boiynsha fanattary kóbeiip, ónersúier qaýymnyń súiispenshiligi men yqylasyna bólenip otyr.
