Barselonanyń tanymal radio jelisinde qazaqstandyq ánshi Dimash Qudaibergenniń ánderi shyrqalýda, dep habarlaidy "Ult aqparat".
dimashnews.com saitynyń jazýynsha, «Radio Sant Boi» – Barselonanyń túkpir-túkpirine taralatyn tanymal radio. Radio baǵdarlamasynda mádeniet, mýzyka, sonymen qatar álemdegi ózekti oqiǵalar týraly aitylady.
Júrgizýshiler qazaqstandyq ánshi men onyń «ARNAU» álemdik týrnesine arnalǵan birneshe efir ótkizgen. Máselen, 10 naýryzda baǵdarlama efirinde Dimashtyń reseilik kompozitor Igor Krýtoi jazǵan «Your Love» áni shyrqaldy. Al 20 naýryzda koronavirýspen kúreste aldyńǵy shepte júrgen jandarǵa arnalǵan «We Are One» týyndysy oryndaldy.
«Radio júrgizýshileri, sonymen birge, Dimashtyń týǵan eli týraly málimetpen bólisedi. Ár kontsertinde Otanyna degen ystyq mahabbatyn bildiretin Dimashqa tánti bolǵan habar qyzmetkerleri Qazaqstanǵa degen qyzyǵýshylyqtaryn da jasyrmaidy.
Birde olar baǵdarlamaǵa Qazaqstannan shyqqan, búginde Ispaniiada turatyn áieldi shaqyrdy. Ol tyńdarmanǵa óz eli týraly qýana aityp berdi. Máselen, osy jyldyń 3 maýsymynda efirde qazaqstandyq «Shymbulaq» taý-shańǵy kýrorty týraly sóz boldy», - delingen aqparatta.
Jýrnalist Tereza Llinastyń aitýynsha, Barselonada Dimashtyń jankúierleri óte kóp. Al bolashaqta ol týraly radioda ǵana emes, ispan televideniesinde de habar taratýǵa nietti.
Dimashnews.com saitynda jazylǵandai, D.Qudaibergenge Japoniia televideniesi de efir arnaǵan. Ánshi «NonStop!» dep atalatyn tańǵy baǵdarlamaǵa onlain qatysyp, qazaq tilinde suhbat berdi.
