Biyl Aqtóbede ótken «Baqytty Bala» halyqaralyq konkýrsynyń jeńimpazy Áigerim Tileýbek Dimash Qudaibergenniń Niý-Iorkte ótken jeke kontsertinde óner kórsetti, dep habarlaidy Dimashnews.com saity.
«Baqytty Bala» mýzykalyq baiqaýynyń finaly biyl Aqtóbede ótken bolatyn. Oǵan Qazaqstan, Resei, Ózbekstan, Ýkraina, Túrkiia, Belarýs jáne taǵy basqa memleketterden jas talanttar qatysty. Halyqaralyq dodanyń bas júldesin Nur-Sultan qalasynyń turǵyny Áigerim Tileýbek pen RF-nyń Túmen qalasynan kelgen Islam Balkoev jeńip aldy.
Dimash Qudaibergen de arnaiy syilyǵyn taǵaiyndap, Áigerim Tileýbekti ózimen birge úlken sahnada óner kórsetýge alyp shyǵýǵa ýáde etken edi. Ótken jyly mundai mártebege aqtóbelik Narǵyz Januzaqova ie bolyp, Dimashpen birge Londonda án shyrqady.
Áigerim – elordadaǵy №82 mekteptiń 6-synyp oqýshysy. Ol Amerika sahnasynda «Gaýhartas» ánin oryndady.
«Bastapqyda kontsert qai qalada bolatynyn bilgen joqpyn. Uiymdastyrýshylar bul týraly sál keiinirek aitty. Niý-Iorkte óner kórsetetinimdi bilgen kezde qýanyshymda shek bolǵan joq. Bul – meniń balalyq armanym. Armanym oryndalǵany úshin óte baqyttymyn», - deidi ol.
Áigerim 4-5 jasar kezinde Aiaz ataǵa Niý-Iorktegi Bostandyq músinin kórgisi keletini týraly hat jazǵan. Al dál osy qalada Dimashpen óner kórsetetinin bilgende birden osy hat esine túsken.
«Buǵan deiin Túrkiiada, Máskeýde boldym. Meniń armanym kóp, sonyń biri – álemdi sharlaý. Alǵan áserimdi jazyp otyrǵym keledi, sol sebepti Niý-Iorkke barýdy asyǵa kúttim. Kún saiyn ol jaqta aýa raiy qalai ekenin internet arqyly baqylap, sol jaqta júrgen kúnimdi elestettim», - deidi oqýshy qyz.
Ol Dimashqa elikteitinin jasyrmaidy. Jas bolǵanyna qaramastan, túrli deńgeidegi sahnalardy baǵyndyryp, álemge óz halqy týraly án shyrqap júr.
«Men elimizde Dimashtai tulǵa bar bolǵanyn maqtan tutamyn. Oǵan uqsaǵym keledi. Dimash siiaqty ulttyq bolmysymdy jáne qarapaiymdylyq qasietin saqtap qalǵym keledi. Elimniń mártebesin asqaqtatsam deimin», - deidi ánshi.
Eske salaiyq, D.Qudaibergenniń 10 jeltoqsanda Niý-Iorkte ótken jeke kontsertine álemniń 60 elinen jankúierler jinaldy. Olar ánshini Djon Kennedi atyndaǵy halyqaralyq áýejaidan Qazaqstannyń Týymen qarsy alǵan bolatyn. Kontsert ótken «Barclays Center Arena» 19 myń orynǵa eseptelgen. Kórermenderdiń 75 paiyzy amerikalyqtar boldy.
Sondai-aq, Gremmi syilyǵynyń iegeri, perýlik ataqty ánshi Eva Ailan Dimash Qudaibergendi kórý úshin óz kontsertin keiinge shegerip, Niý-Iorkke ushyp keldi.
Kontsert Qazaqstannyń AQSh-taǵy mádeniet kúnderi aiasynda jáne QR Mádeniet jáne sport ministrliginiń qoldaýymen uiymdastyryldy.
