Keshe Máskeýdegi Kreml saraiynda Dimash Qudaibergenniń birinshi jeke kontserti ótti, dep habarlaidy QazAqparat tilshisi.
Qazaq ánshisiniń úsh saǵatqa jýyq ýaqytqa sozylǵan jeke kontserti ótken saraida ine shanshar oryn bolǵan joq. Biletter satylymǵa túsken alǵashqy kúnderde-aq ótip ketken bolatyn. Qazirgi ýaqytta áleýmettik jelide Dimash kontsertiniń videosy júktelgen.
Máskeýdegi kontsertke Dimashtyń shyǵarmashylyǵyna shynaiy berilgen álemniń 50-den astam elinen jankúierler kelgen. Qurmetti qonaqtar arasynda ánshiniń ata-anasy, Qazaqstannyń Reseidegi Elshisi, Qazaqstannyń Mádeniet jáne sport ministri, Resei Premer-Ministriniń jubaiy, estrada juldyzdary jáne ózge de bedeldi azamattar bolǵan.
Dimashtyń ár áni aiaqtalǵan saiyn jankúierlerdiń «Dimash!», «Jaraisyń!» degen daýystardan zal jańǵyryp turdy. Ásirese, qytailyq ónersúier qaýymnyń «Dimashi», «Sheshe» degen aiqaiynan qulaq tunady.
«Dimash «Mahabbat ber maǵan» ánin oryndaǵan sátte qolsham jaryǵymen alqyzyl júrek ustaǵan myńdaǵan qoldyń kóterilýi - erekshe jarqyn, este qalar sátterdiń birine ainaldy. Kelesi fleshmob qazaq áni oryndalǵan sátte boldy. Barlyq kórermen bir mezette Qazaqstannyń týyn kóterdi. Al sońǵy «Stand up!» áni oryndalǵan kezde búkil zaldaǵy kórermen tik turyp qoshemet kórsetti», - dep jazady Dimashtyń fan-paraqshalarynyń birinde.
Qazaqstandyq ánshi Dimash Qudaibergenniń kontsertinen bir kún buryn álemniń 56 elinen 400-den astam jankúier Máskeýde «pre-party»-de bas qosqan edi.
