Ánshi Dimash Qudaibergen men QR-daǵy Bala quqyqtary jónindegi ýákil Arýjan Sain BUU Jahandyq kommýnikatsiialar departamentiniń Qazaqstandaǵy ókili Vlastimil Samekpen kezdesti. "Ult aqparat" bul týraly dimashnews.com saityna silteme jasap habarlaidy.
Áńgimelesý barysynda birlesken jumysty odan ári jalǵastyrý máseleleri talqylandy.
«Dimash Qudaibergen BUU qyzmetin belsendi qoldaýshy jáne #OON75 (#UN75) jahandyq dialogyna atsalysýǵa daiyn. Biyl Birikken Ulttar Uiymy 75 jyldyq mereitoiyn atap ótedi. Alaida, ol koronavirýs pandemiiasyna bailanysty oqshaýlaný kezeńine tuspa-tus kelip tur», - delingen saitta.
«OON75» («UN75») kampaniiasy biyl qańtar aiynda bastalǵan. Maqsaty - álemdi jaqsarta túsý, adamzattyń birtutas otbasynyń basymdyqtaryn talqylaý, sonymen birge birlesken jarqyn bolashaqty qalyptastyrýda úzdik sheshimderdi diskýssiia jolymen anyqtaý.
«BUU-nyń 75 jyldyq mereitoiyn uiymdastyrý jónindegi arnaiy top jaqsy álemdi qurý tarihynda eń iri jáne aýqymdy sanalatyn jalpyhalyqtyq pikirtalas ótkizýge bastama jasady. BUU adamdardyń onlain qarym-qatynasta bolýyna árdaiym kóp kóńil bólip keledi. Qazirgi tańda da, COVID-19 kezeńinde osy baǵytta kúsh salyp, eńbek etip keledi», - delingen aqparatta.
