Mádeniet jáne sport ministrligi «Dikii Arman» degen laqap atpen tanymal qylmys áleminiń serkesi Arman Jumageldievtiń álem chempionatyna qatysqan qazaq boksshylaryna aqsha taratqany túsirilgen áleýmettik jelidegi videoǵa qatysty túsinikteme berdi, dep habarlaidy "Ult aqparat" vedomstvonyń baspasóz qyzmetine silteme jasap.
«Mádeniet jáne sport ministrligi bokstan ulttyq quramanyń daiyndyq jiyndaryna jáne halyqaralyq jarystarǵa qatysýyna 2019-2021 jyldary respýblikalyq biýdjetten 1,5 mlrd teńge bóldi», - dep jazylǵan vedomstvo saitynda.
Ministrliktiń málimeti boiynsha, túrli halyqaralyq jarystar men Olimpiada oiyndaryndaǵy jeńisine, sonyń ishinde álem chempionattarynda mynadai mólsherde aqshalai tólemder qarastyrylǵan:
1-oryn úshin 15 000 AQSh dollary;
2 oryn úshin 7 000 AQSh dollary;
3-oryn úshin 5 000 AQSh dollary.
Al olardyń jattyqtyrýshylaryna kelesi mólsherde:
1-oryn úshin 10 000 AQSh dollary;
2 oryn úshin 5 000 AQSh dollary;
3-oryn úshin 3 000 AQSh dollary qarastyrylǵan.
«QR Dene shynyqtyrý jáne sport týraly» Zańyna sáikes, Qazaqstan boks federatsiiasy Belgrad (Serbiia) qalasynda sportshylardy daiyndaýǵa, bokstan qazaqstandyq delegatsiiany basqarýǵa jáne súiemeldeýge jáne olardyń kommýnikatsiiasyna jaýap beredi.
Ulttyq quramanyń jekelegen boksshylaryna aqsha berý – bul federatsiia men ministrliktiń resmi tulǵasy bolyp sanalmaityn azamattyń jeke bastamasy. Qazir Serbiiada Qazaqstan boks federatsiiasynyń basshylyǵy men jattyqtyrýshylar quramy bar. Olarǵa ministrlik atalǵan fakti boiynsha túsinikteme alý úshin resmi suraý jiberdi.
Qazaqstan Respýblikasy Mádeniet jáne sport ministrligi tarapynan Qazaqstan Respýblikasynyń Ulttyq Olimpiada komitetimen birlesip bokstan ulttyq qurama komandalardyń sportshylaryn sapaly daiarlaý úshin barlyq jaǵdai jasalǵan», - delingen resmi málimette.
Eske salsaq, áleýmettik jelide shetelde júrgen qazaqstandyq Arman Jumageldievtiń Serbiiadaǵy Álem chempionatyna qatysyp jatqan boksshylarǵa aqsha taratqany týraly video paida boldy.
