Jelide Dikii Arman degen atpen tanymal qylmys áleminiń serkesi men álem chempionatyna qatysqan qazaq boksshylary qatysty video tarady, dep habarlaidy Sputnik Qazaqstan.
Áleýmettik jeli qoldanýshylary Dikii Armannyń boksshylarǵa jekpe-jek úshin aqsha berýine narazylyq tanytty. Qazaqstandyqtar qylmys álemi serkesiniń mundai áreketin teris baǵalap, kriminaldyq álemde bedeldi adamnyń osylaisha qazaq boksyndaǵy yqpalyn kórsetip jatqanyn jetkizdi.
Instagram-pablikterdiń biri Dikii Armannyń Qazaqstan atynan shyqqan ár sportshyǵa eki myń dollardan (shamamen 840 myń teńge) taratqanyn jazdy.
"Bizdiń mádeniet jáne sport ministrligi masqara boldy, qylmys áleminiń adamy ministr siiaqty áreket etip júr. Dikii Arman bokstan álem chempionatynda utylǵan sportshylarǵa 2 myń dollar berdi", - delingen video sipattamasynda.
Sondai-aq áleýmettik jeli qoldanýshylary onyń mundai mindetti moinyna alyp, boksshylarǵa chempionatqa qatysqany úshin aqsha bergenine tańǵaldy. Óitkeni ádette sporttaǵy jetistikteri úshin aqshalai yntalandyrý sportshylarǵa memleket tarapynan beriledi.
Dikii Armannyń mundai áreketin jeli qoldanýshylary toqsanynshy jyldarmen salystyrdy. Olar sol kezde qylmys áleminiń adamdary sportshylardy banda qataryna qosqanyn eske aldy.
Al kei qoldanýshy qylmystyq ortada tanymal adamnyń jastarǵa jankúier ekenine tańǵaldy.
Qazir 2021 jylǵy álem chempionatynyń jartylai finalyna Qazaqstan quramasynyń bes ókili shyqty. Sheshýshi jekpe-jekte Temirtas Júsipov (48 keli), Sáken Bibosynov (51 keli), Mahmud Sabyrhan (54 keli), Serik Temirjanov (57 keli) jáne Abylaihan Júsipov (67 keli) synǵa túsedi.
Dikii Arman qazaqstandyq sportshylarmen birge júr
Budan buryn jelide taǵy bir shýly video jariialandy. Ol jerde Dikii Arman bapker róline enip, qazaqstandyq boksshylardy iyǵynan qaǵady. Al sol ýaqytta sportshylardyń tálimgeri únsiz qarap tur.
Qazaqstan boks federatsiiasy bul videoǵa túsinikteme berip, boksshylardy daiarlaý aimaǵyna kim kirip-shyǵatynyna jaýap bermeitinin málimdedi. Sebebi chempionat Qazaqstanda ótip jatqan joq, al uiymdastyrýǵa basqa uiym jaýap beredi.
"Bul chempionat Qazaqstanda emes, Serbiiada ótip jatqandyqtan, biz uiymdastyrýǵa jaýap bermeimiz. Sondai-aq belgili bir adamdardyń sportshylar jattyǵatyn aimaqqa ótýine jaýapty emespiz. Buǵan uiymdastyrýshy tarap jaýap beredi. Bizdiń mindetimiz – boksshylardyń jaqsy nátijege qol jetkizýi, ózderin jaqsy sezinýi, tamaqtaný jáne turatyn jerine qatysty máseleniń bolmaýy", - dep jaýap berdi federatsiianyń baspasóz hatshysy Aian Tólegen.
