Májilis depýtaty Jambyl Ahmetbekov el aýmaǵynda sý tasqynyna qarsy is-sharalardy ótkizýdegi kemshilikterdi atady, dep habarlaidy "Ult aqparat".
«Qazaqstan Halyq partiiasy» elimizdegi sý tasqynyna qarsy is-sharalardy ótkizý jónindegi máselelerdi buryn da birneshe ret kótergen bolatyn. Jyl saiyn bolatyn sý tasqyny qanshama azamattarymyzdyń ómiri men múlkine qaýip tóndirýde. Tasqynmen kúreske bólinetin qarjy kólemi de jyldan jylǵa ósý ústinde. Eger «2017-2020 jyldarǵa arnalǵan sý tasqyny qateriniń aldyn alý jáne joiý jónindegi sharalar kesheni» Jol kartasyna 42 mlrd teńge bólinse, 2020-2023 jyldarǵa arnalǵan osyǵan uqsas Jol kartasyna bólingen qarjy 160 mlrd teńgege jetti. Osydan kelip suraq týyndaidy – nátije qaida?», - dedi J. Ahmetbekov Májilistiń jalpy otyrysynda Úkimet basshynyń orynbasary Roman Skliarǵa joldaǵan saýalynda.
Onyń aitýynsha, ádette, Tótenshe jaǵdailar ministrligi aldymen jaǵdaidyń turaqty ekenin jáne sý tasqynyna daiyn ekenimizdi málimdeidi, al kóktemde elimizdiń júzdegen eldi mekenderi sý astynda qalady. Tasqyn sý turǵyn úilerge, aýlalar men kóshelerge quiylady, avtomobil joldaryn sý basyp, infraqurylymdar buzylady, turǵyndar qaýipti aýdannan shuǵyl kóshiriledi.
«Mine, jaǵdai jyl saiyn osylai qaitalana beredi. Sońǵy bes jyldyń ózinde Qazaqstanda 272 eldi mekendi sý basty, bul 6,5 myńnan astam úi sýǵa ketti degen sóz. Aqmola, Shyǵys Qazaqstan, Qaraǵandy, Qostanai jáne Soltústik Qazaqstan oblystary jyl saiyn sý tasqynynan zardap shegip otyr. Al keshe elimizdiń astanasy – elorda men onyń mańy tasqyn sýdan zardap shekti, Nur-sultan qalasyndaǵy «Esil» Turǵyn úi kesheniniń jertóle – kólikjaiy sýǵa toldy. Tótenshe jaǵdailar ministrligi elorda irgesindegi Qoiandy kentin sý tasqynynan qutqarý úshin shuǵyl attanýǵa májbúr boldy. Bizdiń partiianyń ókilderi tasqyn sýdyń astynda qalǵan Qaraótkel (Ilinka) aýylyna baryp, ondaǵy sý tasqynynyń zardaptaryn óz kózimizben kórdik. Jergilikti turǵyndar dármensiz kúide, eńbekpen tapqan dúnie-múlkinen airylamyz ba dep qatty alańdaýda. Eldi mekenderdi, mal-múlikti sý basyp, búkil eldi sý tasqyny jailaǵan kezde sýsorǵymen arpalysqansha, osy apattyń aldyn alyp, sý tasqynyn boldyrmaýdyń amalyn qarastyrǵan jón emes pe!», - dedi depýtat.
Osy oraida «Qazaqstan Halyq partiiasynyń» fraktsiiasy tiisti suraqtarǵa jaýap berýdi surady.
«Osyndai jaǵdaida baǵdarlama ákimshileriniń baǵdarlamalyq qujattardy naqty oryndaýy jáne olardyń bólingen biýdjet qarajatyn igerýi úshin Úkimet qandai sharalar qabyldamaq?. 2017-2020 jyldarǵa arnalǵan Jol kartasyn oryndaýǵa jaýapty, biraq ony oryndamaǵan tulǵalar qandai naqty jaýapqa tartyldy? Osyǵan deiingi atqarylǵan is-sharalar jetkiliksiz bolsa, budan bylai turǵyn úilerdi, kóshelerdi sý basýǵa jol bermeý jáne basqa da tótenshe jaǵdailardy boldyrmaý úshin, sý tasqynyna qarsy qaýipsizdikti kúsheitýge qandai qosymsha sharalar qabyldanatyn bolady?», - dedi Ahmetbekov.
