Búgin Nur-Sultan qalalyq máslihatynyń kezekten tys 54-shi sessiiasynda birqatar mańyzdy másele qaraldy. Onyń ishinde turǵyn úi sertifikaty beriletin azamattardyń sanatyn anyqtaldy, dep habarlaidy Sputnik Qazaqstan.
Qalalyq jumyspen qamtý jáne áleýmettik qorǵaý basqarmasynyń basshysy Sáýle Nurǵojinanyń aitýynsha, buryn turǵyn úi sertifikattary zańda bolmaǵan. Sońǵy ózgerister aiasynda osy kýálikterdiń anyqtamasy engizildi. Osyǵan bailanysty turǵyn úi sertifikattarynyń mólsheri men ony alýshylardyń sanattaryn aiqyndaý qajet.
"Endi 1 million teńge kólemindegi turǵyn úi sertifikattaryn azamattardyń myna sanattaryna berý usynalady: Nur-Sultan qalasynyń ákimdigine vedomstvolyq baǵynysty memlekettik mekemeler men memlekettik kásiporyndarda qyzmet etetin bilim berý uiymdaryndaǵy pedagogtarǵa, densaýlyq saqtaý uiymdaryndaǵy meditsina qyzmetkerlerine, arnaiy áleýmettik qyzmetterdi kórsetýge qatysatyn áleýmettik qamtamasyz etý uiymdaryndaǵy qyzmetkerlerge, mádeniet jáne sport uiymdarynyń beiindik qyzmetkerlerine, ishki ister ministrligi Nur-Sultan qalasy politsiia departamentiniń qyzmetkerlerine", - dedi Nurǵojina.
Budan bólek, búgingi sessiiada halyqtyń áleýmettik osal toptary - múgedek balalary bar nemese olardy tárbielep otyrǵan otbasylar, "Altyn alqa" men "Kúmis alqa" iegerleri, buryn "Batyr ana", sondai-aq, I jáne II dárejeli "Ana dańqy" ordenimen marapattalǵan kópbalaly analar men tolyq emes otbasylarǵa turǵyn úi sertifikattaryn berý usynyldy.
Máslihat depýtattary turǵyn úi sertifikattaryn alýshylardyń tizimin anyqtaý máselesin qoldap, biraýyzdan daýys berdi.
