Búgin Dúniejúzilik úkimettik emes uiymdar kúnine orai Májilis depýtaty Vera Kim kommertsiialyq emes uiym sektordyń damýyna qatysty pikir bildirdi, dep habarlaidy QazAqparat.
Aita keteiik, búgin Aqparat jáne qoǵamdyq damý ministri Aida Balaeva úkimettik emes uiym ókilderimen kezdesti. Is-shara jyl saiyn 27 aqpanda atap ótiletin Dúniejúzilik úkimettik emes uiymdar kúni aiasynda ótti.
«Kommertsiialyq emes uiym sektory elimizde aitarlyqtai salmaqty rólge ie jáne memlekettik organdarmen ózara is-qimyl arqyly jumys istep keledi. Kommertsiialyq emes uiymdar negizinen áleýmettik blokta qyzmet etip jatyr. Osy oraidaǵy baǵyttar halyqtyń ómir súrýin jaqsartýǵa, ekologiiaǵa, janýarlardy qorǵaýǵa bailanysty», - dedi depýtat elordada ótken kezdesýde.
Onyń aitýynsha, qazirgi kezde kommertsiialyq emes uiymdar memlekettik organdarmen ózara is-qimyl turǵysynda halyq pen memleket arasyndaǵy kópir bolyp tur.
«Biz granttar túrli qoǵamdyq bastamalardy qoldaýǵa bólinetinin bilemiz. Elimizde kommertsiialyq emes sektor damyp kele jatyr. Osy oraida bir naqty baǵytta mamandandyrylǵan servistik uiymdar kóbirek bolǵany durys. Sondyqtan osyndai uiymdar ózderiniń jarǵylyqty maqsattaryn júzege asyrǵany mańyzdy. Atap aitqanda, múmkindigi shekteýli jandarǵa kómek kórsetýge beiimdelse, onda shyn máninde bul servistik uiymdar halyqtyń osy sanatyndaǵy adamdarǵa qoldaý jasaǵany abzal», - dedi Vera Kim.
