Sýarmaly jerlerdi qalpyna keltirý boiynsha naqty sharalar qabyldanǵan joq. Bul týraly Bul týraly Májilistiń jalpy otyrysynda depýtat Qainar Abasov málim etti, dep habarlaidy QazAqparat.
«Búgingi tańda sý resýrstaryn tiimsiz paidalaný ózekti másele bolyp otyr. Atap aitqanda, bul sýdy kóp qajet etetin eskirgen óndiristik tehnologiialardy qoldaný jáne tasymaldaý kezinde sý shyǵynynyń joǵary deńgeii (60% - ǵa deiin). Jalpy, respýblikalyq menshikte uzaqtyǵy shamamen 20 myń shaqyrym bolatyn 3298 sýarý jelisi bar, onyń 11,9 myń shaqyrymy tozyǵy jetken, sonyń saldarynan aýyl sharýashylyǵy jerleri sýarmaly sýmen tolyq qamtamasyz etilmeidi. Nátijesinde, «Nur Otan» partiiasynyń sailaýaldy baǵdarlamasyn oryndaý jónindegi Jol kartasyna sáikes, 600 myń gektar jańa sýarmaly jerlerdi igerýdiń jáne olardy 2,2 mln gektarǵa deiin jetkizýdiń ornyna is júzinde qolda bar sýarmaly jerler azaiyp keledi. Al sýarmaly jerlerdi qalpyna keltirý boiynsha naqty sharalar búgingi kúnge qabyldanǵan joq», - dedi Q. Abasov Premer-Ministrdiń orynbasary Roman Skliardyń atyna joldaǵan saýalynda.
Onyń paiymynsha, qarqyndy tehnologiialardy engizý 1 gektardan 10 mln teńgege deiin tabysty arttyrýǵa múmkindik beredi. Úlgi esebinde Túrkistan oblysynda birneshe sharýashylyqtardyń jetistikterin baiqaýǵa bolady.
«Sondyqtan joǵaryda atalǵan problemalar eldiń azyq-túlik qaýipsizdigi turǵysynan óte mańyzdy jáne jan-jaqty, keshendi, strategiialyq sheshimder qabyldaýdy talap etedi. Irrigatsiialyq júielerdi qalpyna keltirýmen birge, zamanaýi ylǵal únemdeý tehnologiialaryn jappai engizý qajet. Biraq munda da problemalar bar - bul elektr energiiasynyń jáne qajetti infraqurylymnyń qymbattylyǵy», - dedi depýtat.
Osyǵan bailanysty, joǵaryda atalǵan problemalardy sheshý úshin kelesi sheshimderdi qabyldaý qajet:
- Qazirgi zamanǵa sai irrigatsiialyq júielerdi salý jáne paidalanystaǵy júielerdi jańǵyrtý. Nátijesinde, bul kanaldardyń qurylysy jáne olardyń uzaqtyǵy boiynsha esep emes, sýarmaly sýmen tolyq qamtamasyz etilgen jerlerdiń kólemi bolý kerek.
- Sý únemdeý tehnologiialaryn engizýde qoldanystaǵy satyp alýǵa jáne qurylysqa beriletin sýbsidiianyń kólemin 50% ornyna 80% - ǵa deiin ulǵaitý qajet. Sý únemdeý tehnologiiasynyń qajettilikteri úshin balamaly energiia kózderin salýdy sýbsidiialaý qajet.
- «Qazsýshardyń» jaýapkershiligi sýarmaly sýdyń jetkiziletin kólemi boiynsha emes, sýarmaly sýmen qamtamasyz etilgen jerdiń kólemi boiynsha bolý kerek.
- Irrigatsiialyq júielerdi salý kezinde memlekettik-jekeshelik áriptestigin engizý arqyly investitsiialar tartýdy qamtamasyz etý.
