"Bankter qaryzyn tólei almaǵan adamnyń múlkin tárkilegen kezde baǵalaý qunynan 10-15 paiyzdan artyq aýytqymaýy tiis". 22 qyrkúiek kúngi májilis otyrysynda "Aqjol" fraktsiiasynyń depýtaty Andrei Linnik osylai dep málimdedi. Ol eki kún buryn Almatyda bolǵan atysqa túrtki bolǵan jaittarǵa toqtalyp, oqiǵaǵa politsiia ǵana emes, qarjyny retteý organdary nazar aýdarýy tiis dedi. Bul týraly Azattyq agenttigi habarlady.
"Qaiǵyly oqiǵaǵa qaryz alýshynyń bankpen jalǵyz baspanasy úshin daýy túrtki bolǵany belgili. Ashyq derekkózderge qaraǵanda, 121 mln teńge qaryz bergen bank qaryz alýshydan 184 mln teńgege baǵalanǵan adam turmaityn úi-jaiy bar jer telimin tárkilegen. Tárkileý kezinde bank onyń qunyn 96 mln teńgege baǵalaǵan, iaǵni qunyn eki ese tómendetken. Odan bólek, bank qaryz alýshynyń turatyn úiin de tartyp almaq bolǵan. Birneshe jyldan keiin ol maqsatyna jetken. Qaryz alýshy ǵana emes, onyń kámeletke tolmaǵan balalaryn dalaǵa qaldyryp, jalǵyz baspanasynan aiyrdy" dedi Andrei Linnik.
Onyń aitýynsha, elde myńdaǵan azamat osyndai jaǵdaidy bastan keshirip otyr. Qaryz alýshylardyń kóbi sýitsid siiaqty sońǵy amaldarǵa da baryp jatady. Halyqtyń moinynda qaryzdyń kóp bolýyn Ulttyq banktiń joǵary bazalyq mólsherlemesi, ádiletsiz sot sheshimderi, sot oryndaýshylary men bank qyzmetkerleriniń yqtimal astyrtyn sóz bailasýy siiaqty jaittar ýshyqtyryp jiberedi.
Depýtat osyǵan orai elde kópten beri aitylyp júrgen "Jeke tulǵalardyń bankrotqa ushyraýy týraly" zań qabyldaý qajettigin atap ótti. Budan bólek, bankter qaryzyn tólei almaǵan adamnyń múlkin tárkilegen kezde baǵalaý qunynan 10-15 paiyzdan artyq aýytqymaýy tiis, sebebi kepildikke qoiǵan kezde mundai múliktiń quny nesie somasyna qaraǵanda 30-40 paiyzǵa tómendetiledi dedi.
"Osyǵan orai Qarjy naryǵyn retteý agenttigi bankterdiń tárkilengen múlik qunyn azaitý múmkindigin shekteýi tiis dep sanaimyz" dedi ol.
Depýtat sonymen birge nesieni somasyn jasandy túrde ulǵaitpaý, nesie mólsherlemesin azaitý qajettigin alǵa tartty. Ulttyq bank te bazalyq mólsherlemesin qaita qarastyrýy tiis dedi.
20 qyrkúiekte Almaty túbindegi Aqbulaq yqshamaýdanynda politsiia qyzmetkerleri, jeke sot oryndaýshysy jáne úidiń jańa iesi boryshkerdi úiden shyǵarý týraly sot sheshimin oryndaýǵa kelgen. Alaida D. esimdi boryshker olarǵa oq jaýdyrǵan. Atystan bes adam - eki politsiia qyzmetkeri, bir sot oryndaýshy jáne úidiń jańa iesi men onyń dosy qaza bolǵan. Oqiǵaǵa bailanysty "Adam óltirý" jáne "Bilik ókiline kúsh qoldaný" baby boiynsha eki qylmystyq is qozǵaldy.
Bul oqiǵadan soń elde ekinshi deńgeidegi bankterdiń joǵary paiyzdyq mólsherlemesi, azamattardy jalǵyz baspanadan aiyrý, ádiletsiz sot sheshimderi siiaqty máseleler qaita kóterildi.
21 qyrkúiekte Almatyda onnan astam boryshker "Bank tsentr kredit" jáne qalalyq sot, ádilet departamenti aldynda piket ótkizgen. Olar azamattardy jalǵyz baspanasynan aiyrmaý qajettigin aitqan.
