Dúniejúzilik densaýlyq saqtaý uiymynyń (DDU) basshysy Tedros Adrahom Gebreiesýs Jenevada BAQ úshin uiymdastyrylǵan brifing kezinde DDU jańa koronavirýske qarsy preparattar – gidroksihlorohin men hlorohindi synaqtan ótkizýdi ýaqytsha toqtatqanyn málimdedi. Bul týraly CNN agenttigi habarlaidy.
Sheshim juma kúni The Lancet meditsinalyq jýrnalynda jariialanǵan observatsiialyq zertteý nátijeleri boiynsha qabyldanǵan. Zertteý avtorlarynyń aitýynsha, koronavirýske shaldyǵyp, gidroksihlorohin jáne hlorohinmen em alǵan patsientterdiń arasynda ólim deńgeii joǵary bolǵan.
Tedros Gebreiesýs synaq júrgizgen táýelsiz atqarýshy top qazirgi kezde barlyq qoljetimdi dálelderdi qarastyryp, zertteý aiaqtalǵansha preparattardy qoldanýdy ýaqytsha toqtatqanyn málim etti. Atqarýshy topqa zertteýge qatysyp otyrǵan 10 el engen.
Zertteýge 35 elden 400-den astam aýrýhananyń patsientteri qatysýda. Bul – COVID-19 indetine qarsy qaýipsiz ári tiimdi preparattardy izdeý boiynsha jahandyq zertteý jumysy.
DDU basshysy zertteýdiń basqa kezeńderi jalǵastyrylyp otyrǵanyn qosyp ótti. Ol sondai-aq preparattardyń ekeýin de «aýtoimmýndyq syrqattary bar nemese bezgekpen aýyratyn patsientterge qoldaný» qaýipsiz ekenin atap ótti.
CNN-niń jazýynsha, buǵan deiin AQSh prezidenti Donald Tramp dárigermen keńesken soń gidroksihlorohindi kúndelikti qabyldap júrgenin málim etken.
Aqúi basshysynyń aitýynsha, ol koronavirýspen kúres júrgizip otyrǵan meditsinalyq qyzmetkerlerden preparat týraly óte kóp jaqsy pikir estigen. Tramp koronavirýsqa testti birneshe ret tapsyryp, barlyǵynda da teris kórsetkish boldy.
Prezident Tramptyń preparat týraly pikirinen soń, onyń satylymy kúrt artqan.
