Kabýlda jumys saparymen júrgen DDSU basshysy Tedros Gebreiesýs halyqaralyq qaýymdastyqqa Aýǵanstannyń búkil ulttyq densaýlyq saqtaý júiesi tolyǵymen kúireýi múmkin ekenin eskertti. Bul stsenariidi boldyrmaý úshin BUU Shuǵyl kómek qorynan 45 million dollar bóldi, dep habarlaidy QazAqparat BUU Jańalyqtar ortalyǵyna silteme jasap.
Kabýlda sóilegen sózinde Dúniejúzilik densaýlyq saqtaý uiymynyń basshysy doktor Tedros Adhanom Gebreiesýs búginde aýǵan dárigerlerine «kimdi aman alyp qalatynyn jáne kimdi qutqarmaitynyn» tańdaýǵa týra keledi. Óitkeni olardyń barlyq muqtaj adamǵa kómektesýge múmkindikteri joq ekenin aitty.
Ol «Taliban» qozǵalysynyń ókilderimen – Aýǵanstannyń jańa biligimen, sondai-aq meditsinalyq qyzmetkerlermen jáne patsienttermen kezdeskennen keiin osyndai qorytyndyǵa keldi. Qarjylyq qoldaýsyz myńdaǵan meditsinalyq mekeme qajetti kerek-jaraqtardy satyp ala almaidy, al dárigerlerge jalaqy tólenbeidi.
Dári-dármektermen qamtamasyz etýde aitarlyqtai problemalar týyndaǵan, atap aitsaq, jetkizý tizbegi buzylǵan. Koronavirýstyń taralýy aiasynda kovid naýqastaryna qyzmet kórsetetin 37 aýrýhananyń toǵyzy jabylǵan. Qysqartýlar aýrý juqtyrǵandardy anyqtaý men naýqastarmen bailanysta bolǵandardy izdeýden bastap vaktsinatsiiaǵa deiingi pandemiiamen kúresýdiń barlyq jaǵdaiyna áser etti.
DDSU basshysy Aýǵanstandaǵy áielder men qyzdardyń quqyqtary máselesine nazar aýdardy. «Elde meditsinalyq mekemelerdiń sany azaiyp, áiel dárigerlerdiń jumysqa shyqpaitynyn eskere otyryp, aýǵan áielderi dárigerlerdiń kómegine júginbeýge tyrysady», - dep eskertti ol. Onyń aitýynsha, DDSU seriktestermen jumys isteýge jáne qyzdar men áielderdiń densaýlyq saqtaý salasynda bilim alýyna, sondai-aq áielder arasynan dárigerlerdi oqytýǵa qarajat salýǵa daiyn.
DDSU málimetteri boiynsha, 15 tamyzda «Talibanǵa» bilik ótkenge deiin Aýǵanstannyń 2,2 million turǵyny COVID-19 vaktsinasyn alǵan. «Sońǵy aptalarda halyqty vaktsinatsiialaý qarqyny kúrt tómendedi. Vaktsinanyń 1,8 million dozasy paidalanylmai qaldy», – dedi doktor Tedros.
Ol jaǵdaidy ózgertý úshin shuǵyl sharalar qabyldaýǵa jáne jyl sońyna deiin Aýǵanstan turǵyndarynyń kem degende 20 paiyzyn koronavirýs infektsiiasyna qarsy vaktsinalaýǵa shaqyrdy.
