QR Prezidenti ákimshiligi basshysynyń birinshi orynbasary Dáýren Abaev memlekettik marapattardyń «qunsyzdanýy» týraly pikir bildirdi, dep habarlaidy QazAqparat.
«Áýeli aitatynym, marapattardyń báriniń dáreje-deńgeii bolady. Muny marapat devalvatsiialanyp bara jatyr degen ýájge qatysty aityp otyrmyn. Sanaýly ǵana adamdarǵa beriletin ordender men medalder bar. Ondai marapat jyl saiyn berilip jatqan da joq. Mereitoi medalderiniń jóni basqa. Ondai marapat elimizdiń damýyna eleýli úles qosyp júrgen túrli saladaǵy, túrli óńirdegi birtalai qairatkerge buiyrady», - dedi ol «Ashyq dialog» suhbatynda.
Onyń paiymynsha, memleket bergen marapattardyń quny qatardaǵy kásibi mamandardyń eńbegi turǵanda eshqashan túspeidi.
«Ózińiz jai ǵana elestetip kórińiz. 30 jyl eńbek ótili bar, azamat degen atqa laiyq júzdegen adamdy tárbielegen muǵalimge «medalińiz qunsyzdanyp ketti, baǵasy qalǵan joq» degendi túsindirip kórińiz. Osyndai júzdegen muǵalimdi marapattadyq. Dál osy ýájdi ómir boiy kásiporyndarda nemese aýyl sharýashylyǵynda eńbek etken «Eńbek dańqy» ordeniniń 126 kavalerine aityp kórińiz. Nemese 133 Eńbek ardagerine, pandemiiamen áli kúresip jatqan júzdegen dárigerge aityp kórińiz. Bul marapattar – olardyń ólsheýsiz eńbegi men qyzmetine qoǵam men memlekettiń kórsetken qurmeti», -dedi Prezident ákimshiligi basshysynyń birinshi orynbasary.
