Prezident ákimshiligi basshysynyń birinshi orynbasary Dáýren Abaev «Ashyq dialog» baǵdarlamasynda birqatar suraqqa jaýap berdi. Otandyq qana emes, reseilik aqparattyq keńistikti eleń etkizgen oqiǵa talqyǵa tústi, dep jazady Baq.kz portaly.
«Ǵalamtorda jariialanǵan keibir jariialanymdardyń negizinde reseilik depýtattar Qazaqstandaǵy orys tiliniń jaǵdaiyna qatysty narazylyqtaryn bildirgen bolatyn. Bul jaǵdaiǵa qatysty qandai pikir aita alasyz?» dep surady baǵdarlama júrgizýshisi Dáýren Abaevtan.
Eshqandai kúmánsiz: mundai jaǵdailar óreskel ári oǵan jol berýge bolmaidy. Sondyqtan quqyq qorǵaý organdary ádil quqyqtyq baǵasyn bere jatar. Kemsitýshilikke kimniń negiz bolǵandyǵyna, qandai sebepke bailanysty bolǵanyna qaramastan, orys, qazaq nemese basqa ult ókili bolsyn, bizdiń elimizde mundaiǵa jol joq. Onyń ústine, bizdiń azamattarymyzdyń basym kópshiligi osyndai josyqsyz ultshyldyqtyń kórinis tabýyn talqyǵa salady. Ókinishke qarai, mundai qubylystar búkil álemde bolyp jatady. Bul - mundai nárselerdi memleket qoldaidy degendi bildirmeidi nemese úrdis sondai degen sóz emes. Eki-úsh adamnyń qalai bolsa solai aita salǵan sózine qarap 19 mln halqy bar eldiń jaǵdaiy týraly kesip-pishýge bola ma?! Bolmaidy dep oilaimyn, - dep óz oiyn ortaǵa saldy Dáýren Abaev.
Onyń aitýynsha, Qazaqstandaǵy orys tiliniń jaǵdaiy týraly emotsiiamen kóp nárse aitýǵa bolady. Biraq derektermen sóilegen durys.
Bizdiń elimizde halyqtyń 90%-y orys tilin biledi dep aitýǵa bolady. Bul - Reseidiń ózi men Belarýs memleketin qospaǵanda, álemdegi eń joǵarǵy kórsetkishterdiń biri dep sanaimyn. Orystardyń ózderiniń halyq qurylymyndaǵy úlesi qazir 20% shamasynda dep alsaq, bizde mektep oqýshylarynyń 30%-dan astamy orys tilinde bilim alady. Bul tildiń qanshalyqty suranysqa ie ekendigin kórsetip turǵan joq pa? Qazaqstanda 23 myńnan astam orys tili men ádebieti pániniń muǵalimi jumys isteidi. Bul - Ortalyq Aziiadaǵy kez kelgen basqa elderge qaraǵanda anaǵurlym kóp. Sol úshin Qazaqstanda orys tiliniń qysym kórip jatqandyǵy týraly aitý - ádiletsizdik, - dedi Prezident Ákimshiligi basshysynyń birinshi orynbasary.
