Foto: ashyq derekkóz
Qazaqstandyq shabýylshy álem fýtbolyndaǵy eń úzdik 50 jas talanttyń qataryna endi, dep habarlaidy Ult.kz.
Atap aitqanda, almatylyq «Qairat» klýbynyń oiynshysy Dastan Sátpaev NXGN 2026 reitinginde 43-satyǵa ornalasty. Maqala avtorynyń pikirinshe, Qazaqstannan shyqqan ataqty fýtbolshylar birden eske túse bermegenimen, Sátpaev bul túsinikti ózgertýge jaqyn. Ol álem jankúierlerine óz elinen de jarqyn juldyz shyǵatynyn dáleldep keledi.
17 jastaǵy shabýylshy «Qairat» sapynda kózge túsip, aǵylshynnyń «Chelsi» klýbynyń nazaryn aýdarǵan. Klýb ony jazda «Stemford Bridjge» aýystyrý úshin shamamen 4 million eýroǵa kelisim jasaǵany aitylady.
Sondai-aq basylym Sátpaevtyń Chempiondar ligasynda gol soqqan eń jas fýtbolshylardyń biri ekenin atap ótedi. Bul kórsetkish boiynsha ony tek Ansý Fati men Lamin Iamal ǵana basyp ozǵan. Budan bólek, ol Qazaqstan ulttyq quramasy tarihyndaǵy eń jas debiýtant ári gol avtory sanalady.
Eske salaiyq, Goal nusqasy boiynsha álemniń úzdik jas fýtbolshylarynyń alǵashqy úshtigine «Barselona» oiynshysy Lamin Iamal, «Chelsi» klýbynyń ókili Estevan jáne katalondyq klýb qorǵaýshysy Paý Kýbarsi kirgen.
Basylym Sátpaevtyń oiyn stiline de toqtalyp, ony shabýyldy aiaqtaý sheberligi turǵysynan Serhio Agýeroǵa uqsatatynyn jazady. 2025 jylǵy Qazaqstan chempionatynda ol 14 gol soǵyp, 7 nátijeli pas bergen. Endi onyń BlueCo júiesine ótkennen keiin jańa deńgeige qalai beiimdeletini qyzyǵýshylyq týdyryp otyr.
