Búgin qazaq ádebietiniń klassigi, kórkem sózdiń sheberi Beiimbet Mailinniń 125 jyldyǵyna arnalǵan is-sharalar bastaldy, dep habarlaidy QazAqparat.
Jazýshyǵa arnalǵan sharalar Beiimbet Mailin aýdanyndaǵy konferentsiiamen bastaldy. Jiynǵa oblys ákiminiń orynbasary Marat Júndibaev, Qazaqstan Jazýshylar odaǵynyń tóraǵasy Ulyqbek Esdáýlet, Memlekettik tarihi institýtynyń jetekshi ǵylymi qyzmetkeri Qundyzai Erimbetova, «Egemen Qazaqstan» gazetiniń bas redaktory Aibyn Shaǵalaq jáne basqa da ziialy qaýym ókilderi qatysyp, sóz sóiledi. «Beiimbet Mailinniń murasy – ulttyń asyl qazynasy» ǵylymi-praktikalyq konferentsiiasyn aqyn Aqylbek Shaiahmet júrgizdi.
«Bi-aǵańnyń artyna qaldyrǵan ádebi murasynyń qazaq ádebietinde alatyn orny erekshe. Ol ár túrli janrda qalam terbep, ádebiettiń qyr-syryn jetik meńgerdi. Onyń óleńderi, prozalyq jáne dramalyq týyndylary ádebi shyǵarmalarǵa qoiylatyn joǵary talaptarǵa jaýap beredi. Sondai-aq, ol qazaq jýrnalistikasynyń qalyptasýy men damýyna úles qosty. Biyl 100 jyldyǵy atalyp jatqan «Egemen Qazaqstan» gazetiniń jaýapty hatshysy boldy. Muhamedjan Seralinmen birge «Aýyl» gazetiniń negizin qalady. Ómiriniń sońǵy jyldary «Qazaq ádebieti» gazetinde redaktor boldy», - dedi oblys ákiminiń orynbasary.
Beiimbet Mailinniń dara tulǵasy ýaqyt ótken saiyn asqaqtap, onyń shyǵarmalary halyqtyń asyl qazynasyna ainaldy.
Eske salsaq, biyl Qazaqstan Respýblikasynyń Prezidenti Qasym-Jomart Toqaevtyń jarlyǵymen Beiimbet Mailinniń esimi jazýshy týyp-ósken aýdanǵa berildi.
Marat Júndibaevtyń sózinshe, Bi-aǵanyń ádebi murasyn zerdeleý úshin jańa jobalar bastalady. Máselen, Qostanai qalasynda jas ádebiettanýshy, synshylardyń qatysýymen jastar konferentsiiasy ótedi.
«Osy jas ǵalymdarǵa Beiimbet Mailin atyndaǵy birjolǵy stipendiiany taǵaiyndap otyrmyz. Oblystyq mádeniet basqarmasyna aldaǵy ýaqytta osy stipendiiany turaqty negizde taǵaiyndap, onyń berilý tártibin ázirleýdi tapsyramyn. Sonymen qatar, oblystyq teatrlar sahnasynda Beiimbet Mailinge arnalǵan jáne onyń shyǵarmalary boiynsha spektaklder qoiý qajet», - dedi Marat Júndibaev.
Konferentsiia barysynda ziialy qaýym ókilderi, qalamgerler usynystaryn jetkizdi. Oblys ákiminiń orynbasary olardy eskerip, naqty is-sharalar josparyn qabyldaý qajettigin aitty.
