Foto: instagram.com/sama_02_04
Tailandta jol apatynan qaza tapqan qazaqstandyq mýzykant Darhan Júnisbekovtyń jubaiy áleýmettik jelide jazba jariialap, áserli esteligin bólisti, dep habarlaidy Azattyq Ruhy.
«Darhannyń qandai mýzykant bolǵanyn bári biledi. Biraq onyń qandai tamasha kúieý, qamqor áke jáne janashyr bala bolǵanyn biletinder az. Biz úilenbei turǵan kezde ol «Men seniń kúieýiń ári dosyń bolamyn, kerek bolsa, aǵa men ákeniń qamqorlyǵyn tanyta alamyn» degen edi. Sol kezde onyń ne aitqysy kelgenin túsinbeppin. Biraq turmysqa shyqqannan keiin bárin kórdim, túsindim.
Ol birge túsken sýretimizdi jelige salma, til-kóz tiedi deitin edi, tipti, sýretke túserde meniń de, balalarymyzdyń da mańdaiyna kúie jaǵyp qoiatyn. Ol meni Bórtem, Kún men Aiym deitin. Men úshin ol Altyn boldy. Meni alǵaýsyz erkeletetin, al júkti kezimde qorbańdap ony ainalyp júretinmin, kontsertke ketken kezde uiyqtamai kútip otyratyn edim», - dep eske alady mýzykanttyń jubaiy.
Ol kúieýiniń árqashan shyǵarmashylyq josparlaryn aityp, ánderin alǵash ózine tyńdatqanyn aitady.
«Seniń aitqan ár sóziń jadymda saqtalyp qalmaq. Sońǵy ret «Keshir, ýaqytty birge ótkizemiz dep ýáde berip edim, biraq úlgere almadym, men stýdiiadamyn, esh úlgere almai jatyrmyn, jumys kóp, qolym tigende mindetti túrde senderge ýaqyt bólemin» degen ediń. Biylǵa qansha jospar quryp, óz isińnen baqytqa bólenip júrgen ediń. Seniń sol jaqqa barmaýyń kerek edi. Jospardan tys, aiaqasty kettiń. Eshqashan ótirik aitpadyń. «Meni bári osy qalpymda qabyldasyn» deitinsiń. Seniń árqashan óz aýditoriiań bolady. Sen meniń jaýyngerimsiń... Janym. Altynym», - dep jazdy ol.
Aita keteiik, aldaǵy ýaqytta rep-oryndaýshynyń aiaqtalmai qalǵan albomy jaryq kórmek. Onyń barlyq ániniń quqyǵy uly Ádi men qyzy Aidanaǵa tiesili bolady.
Eske salaiyq, osydan birneshe kún buryn Darkhan Juzz degen atpen tanymal bolǵan ánshi, mýzykant Darhan Júnisbekov Tailandta jol apatynan qaza tapqan edi. QR SIM otandasymyzdyń denesi erteń Phýket – Almaty áýe reisi arqyly Qazaqstanǵa jetkiziletinin málimdedi.
