Almatyda ótken onlain brifing barysynda dárigerler KVI juqtyrǵan naýqastardyń keibiri nege úide emdelýi tiis ekendigin túsindirdi, dep habarlaidy QazAqparat.
Dáriger infektsionist Tamara Utaǵanovanyń aitýynsha, álemde KVI emdeýdiń klinikalyq diagnostikalyq hattamasynyń 9 redaktsiiasy engizilgen.
«Halyqaralyq aýrýlar klassifikatsiiasy boiynsha aýrýlardy qalai tirkeýdi anyqtadyq. Qarqyndy terapiia jáne reanimatsiialyq bólimshelerge qai naýqastardy jatqyzý kerek. Simptomy joq naýqastar, jeńil naýqastardy emdeý, meditsinalyq-sanitarlyq kómek uiymdarynyń kómegi, baqylaýy, qalai oqshaýlaný kerektigi týrasynda ózgerister engizildi», - dedi maman.
Qazir sonymen qatar naýqastardy emdeýge aldyńǵy hattamada joq dáriler engizilgen.
«Munyń aldynda barlyq naýqastar aýrýhanaǵa jatqyzylatyn edi, aýrýhanada baqylanatyn. Olardy simptomdary bolsyn-bolmasyn dári-dármekpen emdeitinbiz. Qazir eger esh belgileri joq bolsa, aýrý jeńil ótse, em-sharalaryn júrgizý qajettiligi joq. Eger naýqastyń boiynda qosalqy aýrýlar bolatyn bolsa, onda ol adam birinshi sanitarlyq meditsinalyq kómek uiymdarymen baqylanady. Baqylaý qashyqtan bolady, kúndelikti 2 ret qońyraý shalý nemese 3 kúnde bir ret videoqońyraý shalý arqyly jasalady», - dedi Tamara Utaǵanova.
Sonymen qatar, dáriger úiinde simptomsyz jatqan naýqastarǵa ne ishý kerektigin túsindirdi.
«Úide jatqan simptomy joq adamdar ne dári ishýi kerek? Arnaiy dári qabyldanbaidy. Tek baqylaý júrgiziledi. Naýqastyń qyzýy kóterilgende - qyzýǵa qarsy, tamaǵy jybyrlasa - simptomaktikalyq em jasaý kerek», - dedi T. Utaǵanova.
Qalanyń bas sanitarlyq dárigeri Jandarbek Bekshinniń aitýynsha, qazir qalada sońǵy 10 kúnde aýrý kórsetkishi 5% bolyp tur.
Qala biligi osy kórsetkishti 1%-ke deiin tómendetýdi maqsat tutyp otyr. Sonymen qatar, qaladaǵy tósek oryndardyń 95 paiyzy tolǵan.
