Mektepterde koronavirýstan qorǵanýǵa qatysty túsindirý jumystary júrip jatyr. Bul týraly Nur-Sultan qalasy Qoǵamdyq densaýlyq saqtaý basqarmasynyń bas mamany Jeleýhan Primqulov málim etti, dep habarlaidy QazAqparat.
«Oqý jyly bastaldy, oqýshylar, stýdentter dástúrli oqý formatyna oraldy. Árine, bul barlyǵymyzǵa qýanyshty jańalyqtardyń biri boldy. Egerde jaz ailardaǵy jaǵdai qaitalanbasyn desek, densaýlyqty saqtaý máselerine tiisti mán berýimiz qajet. Bilim berý mekemelerinde balalar arasynda aýrýdyń órshýine jol bermeýimiz kerek. Ol úshin ata-analar men muǵalimder vaktsina alý tiis. Júrgizilip jatqan vaktsinatsiialaý ózińizdi jáne balalardy indetti juqtyryp alýdan qorǵaidy. Oqý jylynyń bastalýymen qala mektepterindegi meditsina qyzmetkerleri oqýshylarǵa nusqaýlyq júrgizip, balalarǵa epidemiologiialyq talaptardyń saqtalýyna mán berip otyr. Qol gigienasynyń mańyzdylyǵy, betperde taǵý týraly túsindirmeli jumystary aldaǵy ýaqytta da jalǵasyn tabady», - dedi Jeleýhan Primqulov onlain brifingide.
Onyń aitýynsha, syrqattanýshylyqtyń ósýi jaz mezgilinde baiqaldy. Maýsym aiynan bastap balalar aiqyn kóringen klinikalyq belgilermen túse bastady.
«Balalardyń otbasyndaǵy ekpe almaǵan adamdarmen bailanystan soń aýyra bastaǵany baiqaldy. Iaǵni birinshi kezekte vaktsina saldyrmaǵan týystary men jaqyndary óz balalaryna juqtyryp alyp júr. Qazirgi kezde KVI-dyń oń nátijesi bar 43 bala statsionarlyq em qabyldap jatyr. Reanimatsiia bólimshesinde balalar bizde joq. Jyl basynan beri KVI-men 10 myńnan astam bala aýyryp shyqty», - dedi basqarma ókili.
