Foto: ashyq derekkóz
Densaýlyq saqtaý ministrligi ózin meditsina qyzmetkeri retinde tanystyryp, azamattarǵa qońyraý shalatyn alaiaqtar kóbeigenin eskertti, dep habarlaidy Ult.kz.
Vedomstvo málimetinshe, kúmándi tulǵalar emhana atynan habarlasyp, túrli syltaýmen SMS-kodtar men jeke derekterdi suraidy. Ásirese egde jastaǵy adamdar olardyń nysanasyna ainalyp otyr.
Mundai jaǵdailardyń biri týraly jeli qoldanýshysy Gúlnara Shakimova jazdy. Onyń aitýynsha, 77 jastaǵy anasyna emhanadan shyqqan boida belgisiz adam qońyraý shalyp, ózin immýnolog retinde tanystyrǵan. Ol taldaýǵa jazý úshin kelgen SMS-kodty surap alǵan.
Kóp uzamai áieldiń telefonyna túrli bankterden nesie maquldanǵany týraly habarlamalar kele bastaǵan. Keiin emhana qyzmetkerleri mundai kodtardy eshqashan suramaitynyn rastaǵan.
Ministrlik mundai áreketter keń taralǵan alaiaqtyq shema ekenin atap ótti.
DSM azamattarǵa mynadai saqtyq sharalaryn qatań ustanýdy usynady:
SMS-kodtar men jeke derekterdi eshkimge bermeý;
telefon arqyly aitylǵan aqparatty tekserý;
kúmándi qońyraýlar bolǵan jaǵdaida emhanaǵa nemese quqyq qorǵaý organdaryna júginý.
Sondai-aq qabyldaýǵa jazylý tek resmi servister arqyly júzege asatyny eskertildi: eGov.kz, eGov Mobile jáne Damumed.
Ministrlik dereginshe, meditsinalyq júielerdiń buzylýy nemese patsientterdiń derekterine zańsyz qol jetkizý faktileri tirkelmegen. Alaida azamattardy aldaý arqyly jeke málimetter men qarjylyq servisterge qol jetkizý áreketteri jiilegen.
