Kollaj: Ult.kz
Aktrisa Dariǵa Badyqovanyń jýrnalist Nurseiit Jylqyshybaiǵa qarsy aryz-shaǵymy boiynsha qozǵalǵan sot isinde Badyqova jeńilis tapty, dep habarlaidy Ult.kz.
Aktrisanyń burynǵy kúieýi Darhan Musaev Nurseiit Jylqyshybaidyń «Ýaqyt kórsetedi» YouTube-arnasyna jeke ómiri jáne Dariǵa Badyqovamen arasyndaǵy qarym-qatynas týraly aitqan.
Alaida Dariǵa Badyqova sotqa joldaǵan talap aryzynda jýrnalistiń beinematerialyn shyndyqqa janaspaidy dep tanýdy, ony jeliden joiýdy jáne jariia túrde keshirim suratýdy suraǵan. Sondai-aq talapker 1 000 000 teńge moraldyq ziian, 2 500 000 teńge zańgerlik qyzmet aqysy jáne 802 128 teńge saraptama shyǵyndaryn qosa alǵanda, jalpy mólsheri 4 million teńgeden asatyn ótemaqy suraǵan.
Nurseiit Jylqyshybaidyń advokaty Inga Imanbai bul isti sóz bostandyǵyn qorǵaý, jýrnalistikany sot arqyly tunshyqtyrýǵa jol bermeý dep esepteitinin aitady.
«Bul is men úshin jai ǵana kezekti protsess emes. Meniń birinshi mamandyǵym – jýrnalistika, ekinshi mamandyǵym – zańger. Sondyqtan men úshin mindet qana emes, ishki zańger retinde sóz bostandyǵyn qorǵaý – kásibi ustanym. Munda men eshkimniń jeke ómirine aralasqan joqpyn. Men qorǵaǵan nárse – jýrnalistiń kásibi erkindigi, pikir alýandyǵy jáne avtordy óz shyǵarmashylyq ónimin óshirýge májbúrleýge jol bermeý printsipi», – degen.
