Búgin Rio Olimpiadasynyń chempiondary men júldegerleri elge oraldy. Túngi ýaqytqa qaramastan, sportshylardy kútip alýǵa týystary men jaqyndary, jankúierleri keldi.
"Men óte qýanyshtymyn, ol úshin qatty ýaiymdadym, óte qorqynyshty boldy. Men onyń jaraqatyn kórgende, qulai jazdadym. Qazir barlyǵy jaqsy, biz óte baqyttymyz", - dedi D. Eleýsinovtiń zaiyby "QazAqparat" tilshisine bergen suxbatynda.
Eske sala keteiik, Rio Olimpiadasynda bokstan ótken jarysta 69 kelide óner kórsetken qazaqstandyq boksshy Daniiar Eleýsinov jartylai finalda frantsýz Súleiman Sissokoǵa qarsy kezdesý ótkizdi. Jekpe-jektiń birinshi raýndy Daniiar Eleýsinovtiń aiqyn jeńisimen aiaqtalǵan bolatyn. Ekinshi raýndta da qazaqstandyq boksshy edáýir basymdyqpen alda kele jatqan. Alaida qarsylasynyń basyna soǵylǵan Daniiar shekesin qatty jaraqattap alǵan edi. Dáriger kezdesýdi jalǵastyrýǵa tyiym saldy. Tóreshiler jeńisti qazaqqa berdi. Sissoko bolsa, qola medal ielendi.
Finalda D. Eleýsinov Ózbekstan boksshysy Shaxram Giiasovtan basym tústi.
Riodan Daniiarmen birge onyń ákesi jáne jeke bapkeri - Marat Eleýsinov te keldi.
"Ishtegi sezimdi sózben aityp jetkizý múmkin emes, men óte baqyttymyn. Biz buǵan kóp jyldar boiy talpynyp keldik, endi mine soǵan da qol jetkizdik. Jankúierlerge myń alǵys. Tanymaityn adamdardyń ózi jazyp jatyr, qońyraý shalyp jatyr - bizge óte qýanyshty", - dep atap ótti M. Eleýsinov.
