Monakodaǵy boks keshinde Olimpiada chempiony Daniiar Eleýsinov nikaragýalyq Markos Mohikamen sharshy alańǵa shyǵyp, jeńiske jetti, dep habarlaidy QazAqparat tilshisi.
Batys Qazaqstan oblysynan túlep ushyp, áýesqoi bokstaǵy barlyq biikti baǵyndyrǵan 1991 jylǵy Daniiar Eleýsinovtiń (4-0, 2 KO) bul kásipqoi ringtegi besinshi kezdesýi bolsa, 33 jasar Markos Mohika (16-2-2, 12 KO) odan áldeqaida tájiribeli ekeni anyq-ty.
Kásipqoi ringte júrgenine segiz jyl bolǵan Markos buǵan deiin tek óz elinde ótkizgen 20 jekpe-jektiń 16-synda jeńiske jetse, sonyń 12-sin nokaýtpen aiaqtaǵan. Al, kásipqoi bokstaǵy qadamyn biyl ǵana bastaǵan Daniiar tórt aiqasynyń ekeýinde qarsylasyn nokaýtpen jeńgen.
«Kazino de Monte-Karlodaǵy» segiz raýndtyq shaiqasta Daniiar jekpe-jek tizginin birden qolyna alyp, aýyr soqqylar daryta bastady. Ekinshi raýndta-aq qazaqstandyq boksshy qarsylasyn nokdaýnǵa jiberdi. Mohika ekinshi ret nokdaýnǵa túsken sátte gong ta soǵyldy.
Úshinshi raýndta Daniiar nikaragýalyqty taǵy bir nokdaýnǵa jiberdi. Aqyry Mohika eki aýyr soqqy alǵannan keiin tóreshi jekpe-jekti toqtatty. Nokaýt!
D.Eleýsinov kezdesýden keiin suhbat berip, qazaqstandyq jankúierlerin aldaǵy ýaqytta úlken jeńisterimen qýantatynyn jetkizdi.
Eske sala keteiik, bul keshtiń basty jekpe-jeginde birinshi aýyr salmaqtaǵy burynǵy álem chempiony, reseilik Denis Lebedev (31-2, 23 KO) amerikalyq Maik Ýilsonmen (19-0, 8 KO) judyryqtasady.
