Eleýsinov jol kólik oqiǵasyna tap bolyp, politsiia kelgenshe qashyp ketken. Sportshy izdeý barysynda ustalǵan, dep habarlaidy ult.kz.
Nura aýdany boiynsha «102» arnasyna Tóle bi kóshesi men Halifa ben Zaid ál-Nahaian kósheleriniń qiylysynda (Han Shatyr SOO mańy) úsh kólik qatysqan jol-kólik oqiǵasy bolǵany týraly habarlama túsken. Aldyn ala málimet boiynsha, Toyota Land Cruiser markaly, memlekettik nómiri 001 EDM 01 avtokóliginiń júrgizýshisi apatqa kináli bolyp, oqiǵa ornynan izin sýytqan.
Izdestirý sharalary barysynda atalǵan kólik Dostyq kóshesinde, Han Shatyr saýda ortalyǵynyń qarsy betinde toqtatyldy.
Kólikti Daniiar Maratuly Eleýsinov (13.03.1991 jyly týǵan, 2016 jylǵy Olimpiada chempiony, álem chempiony) basqarǵany anyqtaldy. Aldyn ala málimet boiynsha, ol mas kúide bolǵan.
Qazirgi ýaqytta oqiǵa ornynda politsiia qyzmetkerleri jumys istep jatyr. Oqiǵanyń barlyq mán-jaiyn anyqtaý maqsatynda tekserý júrgizilip jatyr.
