Daneliia Tóleshovanyń PR-direktory Tatiana Sinenko ánshiniń America’s Got Talent shoýynan keiingi jospary týraly aitty, dep habarlaidy "Ult aqparat".
Daneliia Tóleshova jobanyń finalynda daýys sany jetpei, júldeger bola almady. Altyn túimeni spichraiter Brendan Leik jeńip aldy.
Aita ketý kerek, final Amerikanyń Los Anjeles qalasynda ótti.
Finalda 14 jasar qazaqstandyq jas daryn Sia atty tanymal ánshiniń «Alive» ánin shyrqady.
Búgin ol konkýrstan tys amerikalyq ánshi Eiva Makspen birge dýet oryndady (Ava Max).
«Men altyn túimeni bireýge berer bolsam, Daneliiaǵa berer edim», - dedi finalda Sofiia Vergara.
«Osy jelide jeńimpaz atanyp milliondy jeńip alsań ne isteisiń degen suraqtar kóp boldy. Men jeńis týraly oilamappyn. Adamdar ondai aqshany ne isteitinin elestetip te kórmeppin. America’s Got Talent maǵan úlken sabaq boldy. Osy shoýda adam eńbektense, kóp jetistikke jete alatynyn túsindim. Jarty jyl tynymsyz daiyndyqtyń jemisin kórip jatyrmyn. Jolymda armanyna umtylǵan qanshama eńbekqor adamdar kezdesti. Shoýǵa qatysqan ár azamatqa sáttilik tileimin. Qazylar alqasyna ár baǵasy úshin alǵys aitamyn. Ár pikir bildirgen adamǵa rizamyn», - dedi Daneliia.
Ánshiniń aitýynsha, final ol úshin eń aýyr sát bolǵan. Eki-aq kúnde kúrdeli kompozitsiiany daiyndaý kerek boldy.
«Sharshaǵanym sonsha, bir ýaqytta daýsym shyqpai qaldy. Qysqa ýaqytta kúrdeli kompozitsiiany daiyndap shyqtym. Osy án meniń barlyq múmkindigimdi kórsetti. Shyǵarmashylyq jospar týraly aitý qiyn. Úige oralyp men de, komandam da bir apta demalýy kerek. Qashyqtan oqyp jatqan sabaǵymdy jalǵastyramyn», - dedi Daneliia.
