Prezident Qazaqstan halqyna Joldaýynda memlekettiń qorǵanys-ónerkásip kesheni men Áskeri doktrinasyn qaita qaraýdy tapsyrdy. Sondai-aq Qarýly Kúshterdiń syrttan tónetin qaýip-qaterlerge árqashan ázir bolýy kerektigin atap kórsetti, deidi QR Qarýly Kúshteri Bas shtab bastyǵynyń orynbasary – Tárbie jáne ideologiialyq jumystar departamentiniń bastyǵy general-maior Serik Borambaev.
Bas shtab bastyǵy orynbasarynyń aitýynsha, memlekettik apparatta osyǵan qatysty is-qimyldyń pysyqtalǵan jospary bolýy shart.
Bundai jaǵdaida Qarýly Kúshter árdaiym sońǵy qoldaný quraly bolyp tabylady. «Sondyqtan syrttan tónetin qaýipti modeldeý kezinde biz oqiǵalardy damytýdyń barynsha jaǵymsyz nusqalarynyń stsenariilerin pysyqtaimyz», - deidi ol.
«Áskeri qaýipsizdikti qamtamasyz etý máselelerinde jańa óńirlik jáne jahandyq syn-tegeýrinder men qaýip-qaterlerdiń oryn alýyn eskerip, vedomstvoaralyq tásildi qoldaný ózekti bolyp otyr.
Qorǵanys ministrligi barlyq memlekettik organdarmen ózara is-áreket jasaý arqyly, áskeri qaterlerdiń órshýi jáne soǵys jaǵdaiy engizilgen kezde, memleket qyzmetin josparlaýdy júzege asyrady.
Qazirgi ýaqytta birlesken áskeri oqý-jattyǵýlardy ótkizý josparlanyp otyr. Jaǵdaidyń kenetten ózgerýine qatysty máseleler de pysyqtalady. Bul rette Aýǵanstandaǵy jaǵdaidyń shielenisýine bailanysty qaýip-qaterler de negizge alynady.
Jańa Áskeri doktrinada biýdjettiń múmkindikteri men otandyq ekonomikanyń áleýetine tónýi múmkin qaterler eskeriledi. Osylarǵa súienip, jalpy memlekettik qorǵanys saiasatynyń naqty saiasi baǵdarlary qalyptasady».
